Kum 2020-ah lirthei 23,520 ziak lut

Kum 2020 chhung khan Mizoram sorkar (Transport department)-ah lirthei 23,520 ziah luh thar a ni a, chawhrualin, thla khatah lirthei 1,960 ziak lut zel ang leh, Pathianni leh sorkar chawlh ni dangte tiam vekin ni khatah lirthei 64.26 zel ziak lut ang an ni.

Nikum chhunga lirthei ziah luh thar 23,520 zinga 15,479 (65.81%) chu Aizawl district a ziah luh a ni a, chu'ng zinga 11,314 (73.09%) chu two-wheeler a ni. Mizoram puma lirthei 23,520 ziah luh thar zinga 16,568 (70.44%) chu two-wheeler a ni bawk. Nikum vêk khan driving license 9,719 leh learner license 29,423 pek chhuah a ni.

Covid-19 léng kaihhnawiha inkhuahkhirhna hrang hrang vanga lirtheite an tlân mumal loh avangin kum 2020 khan kum dang angin sum an hmuh ṭhat loh thu Transport hotute chuan Vanglaini palai an hrilh a, "Tax kan lâkna hrang hrang aṭangin lut tho mah se, lirthei an tlân mumal thei lo a, sum kan hmuh tur tam tak kan hmu dawn lo niin a lang," an ti a; sorkar kum kal lai meka an beisei (target) chu hmuh tlin loh deuh an inrin thu an sawi.

Transport department hian kum 2019-20 financial year-ah target cheng nuai 3203.70 an nei a; State Transport Authority leh MV Wing aṭangin Rs. 39,92,73,880, passenger & goods tax aṭangin Rs. 7,43,78,462, supplies & disposals aṭangin Rs. 2,70,000 leh road transport (MST wing) aṭangin Rs. 2,15,43,545 an hmuh a, a vaiin Rs. 49,51,95,887 an hmu chhuak a ni.

Aizawl    15,479

Lunglei    2,124

Siaha    918

Champhai    1,352

Kolasib    1,258

Serchhip    986

Lawngtlai    886

Mamit    537