Library-a sem tur lehkhabu vailiam

Rural Development & Administration (RDA) minister Prof. Lalnilawma chuan nimin zing khan thingtlang khaw hrang hranga library sakna tura hmalakna, ‘Establishment of New Library in Mizoram Project’ hnuaia library-a dah tur lehkhabute a vailiam.

Lehkhabu sem thawh khatnaah hian Mizorama khaw 69-ah lehkhabu hrang hrang sem a ni phawt dawn a; vailiamna inkhawm hi DRDO, Aizawl pisa kawtah buatsaih niin, RDA secretary R Zarzosanga'n a kaihruai.

Minister Prof. Lalnilawma chuan, Establishment of New Library in Mizoram Project chu Special Assistance to States for Capital Investment (SASCI) Part-VII hnuaia thingtlang khuate tihhmasawnna tura hmalakna pawimawh tak a nih thu a sawi a, " Ministry of Finance aṭanga hmuh a ni a, Mizoram khaw hrang hrang, hmun 273-a library sak tura ruahman a ni a, nodal department atan RDA department ruat a ni," a ti.

RDA Minister chuan, ‘Establishment of New Library in Mizoram Project chu ṭhalai leh naupang zawkte'n finna leh thiamna an chhar chhuah theih na tura hmalakna a nih thu a sawi bawk.

Establishment of New Library in Mizoram Project hnuaiah hian library tur in 229 sak thar a nih bakah, in awm sa 44 thawm ṭhat a ni tawh a; bungrua - bookshelf (lehkhabu dahna), librarian leh library tlawhtute dawhkan, chair, computer, printer, internet connection, LED TV, 3KVA power back-up leh bookrack te dah tura ruahman a ni.

Library-a dah tur lehkhabute chu National Book Trush (NBT) leh dawr (opemn market) aṭanga lei tur niin, a vaiin 2,81,190 lei tura ruahman a ni a; library pakhatin NBT aṭanga lei lehkhabu 1,030 leh dawr aṭanga lei 358 ṭheuh an dawng dawn a ni.