Khawvel huapa scientist ṭha thlan zingah Dr Samuel-a a tel

National Institute of Technology (NIT), Silchar-a associate professor Dr Samuel Lalṭhazuala Rokhum chu Stanford University leh khawvel research publication journal rintlak Elsevier ten khawvela scientist ṭha an thlan chhuah 'Top 2% Scientists List, 2025' zingah a tel.

Dr Samuel Lalṭhazuala Rokhum s/o TL Khama, Kolasib New Diakkawn hi Chemistry subject-a doctorate degree hmu a ni a; NIT, Silchar-ah August 26, 2013 aṭangin a thawk. 'Top 2% Scientists List 2024-ah a lo lang tawh bawk a; Mizo zinga Top 2% Scientists List-a lang awm chhun a ni.

Dr Samuel Lalṭhazuala Rokhum hian research publication 160 chuang nei tawhin, H-index 43 a nei mek a, science & technology lam hawi lehkhabu pali a ziak tawh bawk. Science journal ṭhaa ngaih International Journal of Energy Research leh Journal of Nanotechnology-ahte academic editor a ni mek a ni.