KHAWTHLIR

Thisen pe

Border Security Force (BSF) 191 Battalion-a awmte chuan nimin khan Civil Hospital, Aizawl tan thisen unit 24 an pe a, petute mipa 23 leh hmeichhia pakhat an ni. Indian Army 166 Infantry H Company (Mizo Territorial Army) pawhin nimin khan Synod Hospital-ah thisen unit kua an pe bawk.

Sawhthing lei/hralh

Lawngtlai District Agricultural Marketing Committee chu September 29, Thawhṭanni khan district bawrhsap Donny Lalruatsanga kaihhruaiin DC conference hall-ah an ṭhutkhawm. Sawhthing lei thawh khatna leh thawh hnihnah Lawngtlai district aṭangin sawhthing kg 378,387 lei niin, loneitute hnenah direct benefit tarnsfer hmangin sawhthing leina man Rs 1,68,20,488 pek a nih thu tarlan a ni.

Iris scanner sem

Khawzawl district civil supplies officer CC Sakhawliana chuan a bial chhunga retailer-te hnenah ration lak dawna ePos machine aṭanga kut zia (finger print) hmuh theih loh vanga mipui harsatna tawh ṭhin sutkianna atan sorkar ruahman Iris scanner a sem. Retailer tu hnenah pawh eKYC tih theih a nih thu sawiin, retailer-te chu dawr hawn hun chhung sorkarin a siam chu ngai pawimawh leh zawm turin a hriattir bawk.

Dynamo vangin thi

Shimoto (28) s/o Jyotirmoy, Marpara South, Lunglei district chu September 28, Pathianni zan khan sangha man tura Jurosury luia a kalnaah dynamo current-in a man hlum. Thu dawn danin, Shimoto hi zankhuaa a haw loh avangin a nupui mangangin September 29, Thawhṭanni zing khan a ngaihven a, luiah thiin a hmu a ni. A nupuiin a hmuh hian dynamo a lo la nung a, a nupui hian a titawp (off) a ni.

Blood Donation Day hmang dawn

Vawiin hi National Voluntary Blood Donation Day a ni a, MSACS leh Association for Voluntary Blood Donation buatsaihin Hrangbana College-ah hman a ni dawn a, MLA Jeje Lalpekhlua khuallian a ni ang.