ASI (Ministerial) training zote thlah

Mizoram Police-a assistant sub-inspector (ministerial) training batch 7-naa training zo mi 18-te chuan nimin khan Police Training School, Thenzawlah Passing Out Parade an nei a; IGP (Training) Meghna Yadav-i'n hmanpuiin, training chhunga ti ṭhate hnenah lawmman a hlan.

ASI(M) training hi thla thum (chawlhkar 14) chhung neih a ni a, indoor leh outdoor training an ti kawp. Out door training-ah physical training, drill leh ralthuam chelek dante zirtir an ni a; indoor training-ah ministerial hna thawhna tura pawimawh subject 16 - New Criminal Laws, Criminal Minor Acts, Mizoram Police Manual, Mizoram Police Act, Central Civil Service Rules, Conduct & Leave Rules, Pension & Financial Rules, Treasury & Audit procedures, Income Tax Rules, Medical Attendance Rules leh Provident Fund Regulations te zirtir an ni.

Meghna Yadav chuan, ASI(M) mi 18-te'n hlawhtling taka training an zo thei chu a lawmpui thu sawiin, hna an thawhnaah inthununna, inpekna leh dikna vawng tlat turin a chah. PTS principal Lalṭhakima'n training chhuakte chu rinawmna thu a tiamtir a ni.

ASI(M) training chhunga ti ṭhate hnenah lawmman sem a ni a; Lalhunruata Fanai hnenah All Round Best leh Best in Indoor Subjects lawmman a dawng a, Jeremy Lalhminghlua Ralte-in Best in Outdoor Training a dawng thung.