Champhaiah Lok Kayal Mela buatsaih

Nimin khan Champhaiah Lok Kayal Mela leh PM Awas Mela Shehri (street vendor loan leh in sak ṭanpuina) Special Campaign buatsaih a ni a, Champhai bawrhsap Mohammad Aaquib-a'n a hmanpui.

Special Campaign hi Champhaia UDPA officer Ngulzathuama'n a kaihruai a; khuallianin thu a sawi bakah, Lead Bank district manager Lawmkima, PMSVANidhi incharge Baby Lalremtluangi leh PMAY-Urban incharge MS Dawngliana ten thu an sawi.

Champhai DC chuan, India ramin intodelh turin hma a la mek a, hmun kilkhawr ber thlenga hrût chhuakin hmasawnna rahbi a chhawp chhuak mek tih a sawi a, "Scheme-te hmang hian Champhai district pumpuiin kan lo hmelhriat a, hmasawnna kawng kan zawh ve theihna tur atan campaign buatsaih a ni," a ti.

Lawmkima chuan, sorkar laipuiin India ram pumpui economy tihhmasawn a tum avangin nasa takin hma a la mek tih sawiin, State Bank of India-in sorkar hnathawk lote tan housing loan scheme thar AASHRAY Home Loan a duan thu leh kum khata Rs 6,00,000 la lut tling lote tan loan Rs 20,00,000 thleng lak theih a nih thu a sawi.