Aibawkah Health Camp buatsaih

Zoram Medical College & Hospital (ZMCH)-a Community Medicine department leh Aibawk MRHRU chuan nimin khan Aibawkah Swasth Nari, Sashakt Parivar Abhiyaan - Health Camp an buatsaih a; doctor-te'n Aibawk khuaa mi 240-te hriselna dinhmun an endik bakah, a thlawnin damdawi an sem.

Health Camp-ah hian Family Adoption Programme hnuaia ZMCH-a MBBS (doctor) zirlaite'n Aibawka an chhungkaw adopt-te leh enkawlte an hruai khawm a; chhungkaw thlan bik awmin, test hrang hrang tihsak an ni.

Inentir tura kal zawng zawngte tan blood pressure, zunthlum leh thil chiu hrang hrang an endik bakah, rih zawng leh san zawng an endik a; TB screening neih a nih bakah, x-ray tih ngaite tan chuap x-ray an tihsak bawk. ZMCH-a thawkte hi Aibawk Primary Health Centre-a doctor leh thawktu dangte'n an pui a ni.