Influenza a lêng; Fimkhur turin mipui chah

Integrated Disease Surveillance Programme (IDSP), Mizoram chuan, tunlaiin India ram hmun hrang hrangah influenza (tlang hrilêng) natna a lên avang leh Mizoramah pawh vei an awm tih hriat a nih avangin fimkhur turin Mizoram mipui an chah.

IDSP hian hriattirna a tichhuak a; influenza natna avangin Lunglei district-ah sikul pahnih chu khâr a lo ni tawh tih a tarlang a, "He natna hi inkai darh theih a ni a, inven fimkhur a ṭul. Influenza natna laka inveng turin puipunna hmuna awm tam loh te, mit, ká leh hnâr khawih loh te, mi dang nen kut leh kut invawn/inchibai loh te, mahni rinthua damdawi ei lohte a ṭha," an ti.

Hri lêng laka him turin khuh leh hahchhiau laiin hmui leh ká hup ṭhin a ṭhat thu tarlangin IDSP chuan, "Sabawnin fai taka kut sil ṭhin tur a ni a, thil tuirîl lam in tam tur. Hritlang khawsik neite chu mi dang hnaih lo thei ang ber a awm tur a ni a, loh theih loh a nih pawhin hmaituamna hman tur a ni," an ti a; influenza kai nia inringhlelte chu doctor ráwn turin an chah.

IDSP chuan, influenza natna chu mi tam zawkin an dampui laiin, mi ṭhenkhat chuan enkawl an mamawh zual thu tarlangin, "Raipuar, nausen, upa lam, natna benvawn neite leh hun rei tak chhung damdawia inenkawl ngaite fimkhur zual a ngai bik a, ni hnih khat hnu pawha hmasawn thei lo leh thâwk lama harsatna neite chuan damdawi-in pan vat tur a ni," an ti.

INFLUENZA LAN CHHUAH DAN

* Khawsik, lu ná

* Taksa ná, sil ṭhêmṭhûm, ruh ná leh chau

* Thawhah

* Hritlang, khuh

* Hrawk nâ

* Naupangah kawṭhalo leh luak

INFLUENZA INKAI DARH DAN

* Mihring leh mihringah

* Khuh leh hahchhiau aṭangin

* Kuta thil khawih aṭangin