Thangmawia'n kawng siam mek a tlawh

Lengteng bialtu MLA L Thangmawia chuan January 9, Inrinni khan Saitual leh Saichal inkar kawng siam mek a tlawh a, kawng enkawltu National Highway & Infrastructure Development Corporation Ltd. (NHIDCL) leh contractor-te chu a nih dan tur ang taka hna thawk zo turin a chah.

Saichal dáia inkhawm tâwi buatsaihah L Thangmawia chuan, Saitual-Saichal-NE Bualpui kawng km. 34.33 laih hna chu MNF sorkar hmasa hun lai, October 31, 2006-ah NEC sum hmanga ṭan a nih thu a sawi a, "He kawng siamna atan hian cheng nuai 3343.60 ruahman a ni a, kum 2011 khan sorkarin revise estimate siamin cheng nuai 863.64 hmuh leh a ni. Chuti chung chuan Saitual-Saichal inkar (km. 23.43) phei chu laih zawh a nih aṭanga kum 10 chuang, vawiin thlengin blacktop loh a la ni," a ti.

L Thangmawia chuan, Saitual-Saichal kawng chu Mizoram hmarchhak khaw eng emaw zatte tana Aizawl panna kawng hnai zawk leh pawimawh tak a ni a, sorkar laipuiin national highway-ah a puan avangin Manipur kalna kawng lûn ber a nih tawh thu a sawi a, "A chhawr ṭangkaitu mipuite'n blacktop a nih hun an nghahhlehna a rei tawh hle," tiin, MNF-in sorkarna an chan leh veleh kawng siam a nih theih nan Chief Minister hoin hma an lâk nghal thu a sawi.

Lengteng Bialtu MLA chuan, kawng siamna atan February 2019 thla tìrah project an thehluh nghal thu sawiin, "A bawhzuina atan Transport minister Pu TJ Lalnuntluanga nen February 4, 2019 khan Union Minister for Road, Transport & Highways kan hmu a ni. A hlawhtlin mai kan beisei laiin Lok Sabha inthlanin a nang a, sorkar tharah PWD-in DPR hran an thehlut leh a ni. Central-in chhuan­lam hrang hrang siamin, blacktop-na tur sum min pe mai thei lo a, ka beidawng hman hial a ni," a ti. 

Kawng siam a nih theih nan Chief Minister-in a nawr zui char char nia sawiin Thangmawia chuan, "MoRTH Minister pawh ṭawngka mai bakah DO letter vawi hnih a thawn tawh. Central sorkar chuan NH-102(B) enkawl hna hi NHIDCL kuta dah turin ruahmanna a nei zui a, April 22, 2020 khan Saitual-Saichal kawng blacktop-na tur cheng vbc. 31.84 sanction zui a ni. Hna thawktu tur pawh nikum tàwp lam khan thlan a ni," a ti a; tun ṭhál chhung ngeiin kawng chu siam zawh ni se a duh thu a sawi. 

NHIDCL hotute sawi danin, kawng hi hmun sarihah ṭhen a ni a, ruahmanna hmasa ang chuan December 2020-ah siam zawh tur a ni. Tunah chuan 32% - 40% zawh a ni tawh a, contractor-te'n tun ṭhál chhunga an zawh loh chuan contractor dang hnenah hlan tum a ni.