COVID-19: Mizoram dinhmun Tualchhunga hri kái an pung

Mizoramah Covid-19 vei January 8, Zirtawpniah mi 16 leh January 9, Inrinniah mi 17 hmuh chhuah a ni a; ni hnih chhunga hmuh chhuah zat chu mi 33 niin, tualchhunga hri kái pung leh hretin, mi 22 an awm. Inrinni leh nimin khan mi paruk chhuahtir an ni thung.

Covid-19 vei January 8-a hmuh chhuahte chu mipa pasarih leh hmeichhia pakua an ni a; ZMC laboratory-a hmuh mi pariat, TrueNAT-PCR hmanga hmuh mi pahnih leh Rapid Antigen Test (RAT) hmanga hmuh mi paruk an ni. January 9-a hmuh chhuah mi 17-te chu mipa 12 leh hmeichhia panga an ni a; ZMC-a hmuh mi 11, TrueNAT-PCR hmanga hmuh pathum leh RAT hmanga hmuh pathum an ni.

January 8-9 chhunga Mizorama Covid-19 vei hmuh thar mi 33 zinga a tam zawk, mi 22 chu Mizoram chhunga hri kái an ni a, mi 22 zingah hri kàina hriat theih loh mi pathum an awm. Mi 33 zingah natna (symptom) lang mi pasarih an awm bawk.

Nimin khan hripui laka fihlim tawh mi paruk chu enkawlna hmun aṭangin chhuahtir an ni a, Aizawl district-a mi vek an ni. Inrinni khan mi pakhat chiah chhuahtir a ni.

Mizorama Covid-19 vei hmuh chhuah tawh chu mi 4,292 an ni a, mipa 3,147 leh hmeichhia 1,145 an ni. Sorkar thuchhuah tarlan danin, nimin tlai dar 5 thleng khan damin mi 4,192 (97.67%) chhuahtir an ni tawh a, mi pakua (0.21%) thi tawhin, enkawl mek mi 91 (2.12%) an awm.

January 8, Zirtawpni khan ZMC laboratory-ah swab sample 291, TrueNAT-PCR hmangin district pasarihah sample 128 leh RAT hmangin district pakuaah sample 518 endik a ni a; a vaiin sample 937 niin, chu'ng aṭanga Covid-19 positive hmuh chhuah 16 chu 1.70% a ni. Mi 16 zinga 12 chu tualchhunga kái an ni a, symptom nei mi pahnih an awm a ni.

Covid-19 vei Zirtawpnia ZMC laboratory-a hmuh chhuahte chu Mizoram chhunga kái chhâwng vek an nih rualin, an kàina hriat veka ngaih a ni a; TrueNAT-PCR hmanga hmuhte chu state pawn aṭanga rawn lutte an ni thung. RAT hmanga hmuh chhuah mi paruk zinga pali chu tualchhunga kái an ni a, hri kàina hriat loh mi pahnih an awm.

January 9, Inrinni khan ZMC labo­ratory-ah swab sample 255, TrueNAT-PCR hmangin district pasarih­ah sample 99 leh RAT hmangin district pangaah sample 435 endik a ni a; a vaiin sample 789 niin, chu'ng aṭanga Covid-19 vei hmuh chhuah 16 chu 2.15% a ni. Mi 17 zinga 10 chu tualchhunga kái an ni a, an zingah symptom nei mi panga an tel.

Inrinnia ZMC laboratory-a hripui vei hmuh chhuahte chu mipa pakua leh hmeichhia pahnih, kum 18-68 inkar an ni a, Aizawl district-a sample lak vek an ni. An zingah symptom nei mi pathum leh tualchhunga hri kái chhâwng pariat an awm. 

TrueNAT-PCR hmanga Covid-19 positive hmuh chhuah mi pathumte chu state páwn aṭanga rawn lut vek an ni a, symptom nei an awm lo. RAT hmanga hmuh chhuah mi pathumte chu tualchhunga kai vek an ni a, an zinga pahnih chuan symptom an nei a ni.

Mizoramah swab sample 1,86,887 endik a ni tawh a, chu'ng aṭang chuan Covid-19 positive mi 4,292 hmuh chhuah niin, endik zat aṭangin 2.30% a ni.

Covid-19 vei hmuh chhuah tawh mi 4,292 zinga mi 2,036 chu Mizoram chhunga kái chhâwng an ni a; mi 2,256 chu Mizoram páwn aṭanga an rawn luh hnua hmuh chhuah an ni thung. 

ZMC-a hmuh chhuahte:

Saron Veng - 6:     Hmeichhia kum 1, 3, 32, 38, 57 & 64; tualchhunga kái, kàina hriat, home quarantine lai, symptom nei lo vek.

CRPF, Aizawl - 2:     Mipa kum 28 & 29, Mizoram chhunga kai chhawng, inkhung hrang lai, symptom nei lo ve ve.

TrueNAT-PCR hmanga hmuh:

BSF, Lunglei - 1:     Mipa kum 27, 199 Bn BSF hmun, Pûkpuia awm, Uttar Pradesh aṭanga rawn lut, symptom nei lo.

Saitual - 1:     Mipa kum 40, Bihar aṭanga haw, symptom nei lo.

RAT hmanga hmuh chhuah:

Ramthar North - 2: Mipa kum 60 leh kum 2; Karimganj, Assam aṭanga haw, home quarantine lai; kum 60 miin symptom a nei.

Assam Rifles - 1:     Mipa kum 40, 46 Bn Assam Rifles hmun, Zokhawsanga awm, Mizorama kái, symptom nei.

Sangau - 1:     Hmeichhia kum 25, tualchhunga kái, symptom nei lo.

Lawngtlai-IV - 1:     Hmeichhia zirlai kum 16, sikul lut tura inbuatsaihnaa sample endiktir, hri kàina hriat loh, symptom nei lo.

Siaha Zero - 1:     Hmeichhia zirlai kum 15, sikul lut tura inbuatsaihnaa sample endiktir, hri kàina hriat loh, symptom nei lo.

ZMC-a hmuh chhuahte:

Maubawk, Aizawl - 5: Mipa kum 18, 32 & 40 leh hmeichhia kum 18 & 68; tualchhunga kài, kaina hriata ngaih, inkhung lai; mipa kum 40 leh hmeichhia kum 68-in symptom an nei, mi dangin an nei lo.

Chhinga Veng - 1: Mipa kum 38, tualchhunga kái, Aizawla private hospital-a inenkawl lai, symptom nei.

Falkawn - 1:     Mipa kum 31, Covid-19 free certificate neih duh vanga sample test, kàina hriat loh, symptom nei lo.

Chanmari, Aizawl - 1: Mipa kum 20, Assam aṭanga haw, home quarantine mek, symptom nei lo.

Sairang - 1:     Mipa kum 34, Assam aṭanga lut, rêl kawng siamtu company camp-a inkhung mek, symptom nei lo.

Indian Army - 2:     Mipa kum 26 & 57; Field Hospital, Ṭhuampuia awm, inkhung lai, symptom nei lo ve ve. Kum 26 mi zawk tualchhunga kái, kum 57 mi tun hnaia Meghalaya aṭanga rawn lut.

TrueNAT-PCR-a hmuh:

BSF, Lunglei - 2:     Mipa kum 29 & 32, tun hnaia state pawn aṭanga rawn lut, quarantine facility-a awm mek, symptom nei lo.

Sihtlangpui - 1:     Hmeichhia kum 30, JNV-a zirtirtu tun hnaia Rajasthan aṭanga rawn lut, home quarantine lai, symptom nei lo.

RAT hmanga hmuh chhuah:

Lawngtlai College Veng - 2: Hmeichhia kum 31 & 50; tualchhunga kái, symptom nei ve ve. 

Lawngtlai Electric Veng - 1: Mipa kum 18, tualchhunga kái, kàina hriat, symptom nei lo.