Champhai kawng siam dan tur enfiah

Minister of state TJ Lalnun­tluanga, Champhai South bialtu MLA chuan January 8, 2020 khan Champhai Town Planning kalpui mek hnuaia hmalakna, Champhai khawpui tuam chhuaka inkalpawhna kawngpui (ring road project) siam hnuaia hmalak lehna tur, Tlangsam-Zote inkar kawngpui siam dan tur a enfiah.

TJ Lalnuntluanga chuan, khawvel changkang leh ṭhang zelah hmathlir thui tak neia khawpui tâwt lutuk tur tiziaawm tura  Champhai Town Planning duan a nih thu sawiin, "Hmalak awlsam hun bawhpelh lo a, a remchan lai tun hun zel chhawr ṭangkai thiam a ṭul. Ramngaw tichereu lo thei ang ber leh leilet phaizawl humhalh chung zela hmalak tum a ni," a ti. Kawng siam hna thawktu tur leh a viltu department mite chu ram tana rohlu hnutchhiah tuma theih­tawp chuah turin a chah.

Champhai Town Planning hnuaia ring road project hmanga Tlangsam-Zote kawng sial thawh khatna tur hi UDPA department kaltlanga thawh tur a ni. A thawh khatnaah Tlangsam-Zote kawng, km. 4 vela thui chu metre 8-a zauin laih tum a ni a, a bak km. 2.5 vela thui chu hmachhawp leh atan dah a ni. Kawngpui siam hna atana ṭulte buaipui zawh veleh kumin ṭhál chhunga thawh ṭan hman tum a ni.

Ring road project hnuaia kutthlakna hmasa Champhai Zotlang-Tlangsam inkalpawhna kawng km. 4.5-a thui laih zauh leh siam hna chu zawh a ni tawh a, white topping leh tura ruahman a ni.