Lei dawh zawh loh hawngah sorkar puh

ZPM Ṭhalai chuan January 9, Inrinni khan thuchhuah siamin, MNF sorkar chu chak tak anga lan leh hmingṭhat an duh luat avangin lei (bridge) la dawh zawh loh hawngah an puh. 

Bairabi tawntirha Kawnpui lui lei dawh chu January 5, 2021 khan Chief Minister-in a hawng tih sawiin ZPM Ṭhalai chuan, "Bairabi Kawnpui lui lei dawh a ni hi lawmawm kan ti tak zet. Amaherawhchu, lei dawh hi hawn a nih hnuah vawiin thlenga hman theiha a la awm miah lo erawh hriatthiam a har kan ti a ni," an ti a; MNF chu sorkar chak tak anga lan leh hmingṭhat an duh luat avangin lei dawh zawh loh chu an hawng a, mipui bum mai pawh an pawisa lo niin an tarlang.

ZPM ṭhalaite chuan, hna thawh chhunzawm hmuh tur awm si loa lungphùm phùm ringawt te, lei la dawh zawh loh hawn ringawtte chu mipui bum tumna leh thamlohna a nih thu sawiin, "Ram hlui zia a nih avangin sim tawh turin MNF sorkar kan ngen. Hetianga an chêt hian MNF sorkar chu mipui bumtu sorkar an nihna leh mahni leh mahni inbum sorkar mai an ni tih a pholang chiang hle," an ti a ni.