Kuminah AMC inthlan buatsaih dawn lo

Mizoram State Election Commission chuan Aizawl Municipal Corporation (AMC) inthlan chu kuminah an buatsaih dawn lo a, an buatsaih hun tur hriat theih a la ni lo.

Vanglaini palai zawhna chhangin state election commissioner (SEC) Dr H Lalthlangliana chuan, AMC inthlan atan electoral roll ennawn mek a nih thu a sawi a, "Final electoral roll chu January 2026 thla tirah a chhuak dawn chauh a, kuminah chuan AMC inthlan buatsaih hman ngaihna a awm tawh lo," a ti.

SEC chuan, AMC term kal mek tawp hmain inthlan an buatsaih hman dawn leh dawn loh an la sawi theih loh thu sawiin, "Inthlan kan buatsaih hun tur kan la hre thei lo. AMC term tawp chho vel leh Assembly session a inrual chho dawnin a lang," a ti a; boruak awm dan thlirin inthlan hun turah thutlukna an siam tur thu a sawi.

Dr H Lalthlangliana chuan, AMC inthlan chu term kal mek tawp hmain buatsaih tur a ni kher lo tih sawiin, "Tun hma pawhin an term tawp hnuah buatsaih a ni tho. Chuvangin, inthlan buatsaih hun tur hi kan la sawi thei lo, kan inbuatsaih chho zel ang," a ti.

AMC term kal meka corporator-te chu March 1, 2021-ah lak luh an ni a, March 1, 2026 hi an term tawp hun tura ngaih a ni.