NIELIT Centre, Lunglei hawn a ni

Union Electronics & Information Technology minister Ashwini Vaishnaw chuan nimin khan New Delhi-ah NIELIT Digital University (NDU) platform thar bakah, NIELIT Centre, Lunglei leh hmun dang palia NIELIT centre-te a hawng.

Hawnna inkhawm hi NIELIT, Aizawl leh NIELIT Extension Centre, Lunglei aṭangin online hmanga chhim a ni a; NIELIT, Aizawla hun hman chu adviser to CM (technical) H Ginzalala, MLA-in hmanpuiin, thawktute leh zirlaite bakah, Zuangtui khawtlang hruaitute leh MZP hruaitute'n an chhim. Lungleiah chuan JB College aṭanga chhim niin, Lunglei West bialtu MLA T Lalhlimpuia'n a hmanpui a, 'Cyber security and artificial intelligence’ tih zirhona hun hman nghal a ni.

Union Minister-in National Institute of Electronics & Information Technology (NIELIT) centre a hawn tharte chu Lunglei (Mizoram) bakah, Muzaffarpur (Bihar), Balasore (Odisha), Tirupati (Andhra Pradesh) leh Daman (Dadra & Nagar Haveli and Daman & Diu)-te a ni.

Ashwini Vaishnaw chuan, NIELIT Digital University (NDU) Platform tharin India ramah zirtirna ṭha zawk bakah, hmasawnna lian tak a thlen beisei thu a sawi. NIELIT director general Dr Madan Mohan Tripathi chuan, NDU platform chu awlsam leh chipchiar zawka NIELIT deemed to be university-in zirna a kalpuina tur a nih thu te, course 101 ruahman a nih thu leh, course chu tihbelh zel tur a nih thu a sawi.

NDU platform hmang hian artificial intelligence, cyber security, data science leh semi-conductors a tualchhung industry-te mamawh thiamna thar chher chhuah tum a ni.

Tarlan danin, NIELIT hi Ministry of Electronics leh Information Technology hnuaia scientific society pakhat a ni a, tun hnai khan deemed to be university dinhmunah hlankai niin, central university puitling ni thuai tura ngaih a ni.