PM-SVANidhi loan dilna thar 159 tihsak

Urban Development & Poverty Alleviation (UDPA) department chuan September 26, 2025 aṭanga Dawrpui Multipurpose Committee Hall-a Lok Kalyan Mela an buatsaihah Aizawla kawtthler dawrkai (street vendor) 159-te tan PM-SVANidhi loan dilna thar an tihsak tawh.

Thu dawn danin, Mela-ah hian PM-SVANidhi scheme hnuaia loan la thar duhte dilna leh loan dil tawhte socio economic profiling buaipuisak a ni a, loan dil nawn duhte dilsak nawn an nih bakah, digital payment la hmang lote chu a hman dan zirtir an ni.

October 1, 2025 thleng khan Mela kaltlangin Aizawla street vendor 159-te loan dilna chu portal-ah thun (upload) a ni a, loan vawi hnih dilna 64 leh loan vawi thum dilna pariat pawh upload a nih bakah, socio-economic profiling tihsak mi 51 leh digital onboard tihpui mi 10 an awm tawh.

PM-SVANidhi scheme hi district tinah kalpui a ni a; Mela zawh hnuah pawh loan dil duhte chuan UDPA Directorate leh district tina UDPA office-ahte ngaihven theih a ni.