Peace City - chak taka hmalak a ni - CM

Chief minister Lalduhoma chuan nimin khan a bial chhunga Thenzawl Vengthlang Branch YMA silver jubilee lawmna a hmanpui a; Thenzawl Peace City din tumin chak taka hmalak mek a nih thu a sawi.

CM Lalduhoma chuan, Thenzawl Peace City chungchang sawiin, "Peace City din tumin chak taka hmalak mek a ni a, hei hian nasa takin kan khaw hmélhmang a rawn thlak dawn a, mipuite inhawng taka kan inbuatsaih a ngai dawn tih i hre lâwk ang u," a ti.

YMA chu ṭanpui ngaite ṭanpuitu a nihna Mizo mipui thinlungah a châm reng tih sawiin Lalduhoma chuan, "Tunlai khawtlang nunah hian ṭhangtharte hian ṭanpui ngaite hnuchhawn a, kan hmaizah zâwngte lam chauh kan bengkhawn ang tih a hlauhawm," a ti a; hmeithai, fahrah leh chhuanchhamte lam hawi tlat turin YMA member-te a chah.

Thenzawl Vengthlang Branch YMA hi kum 2000-ah din a ni a, member 925 an awm mek. Jubilee lawmnaah hian an hruaitu ni tawhte leh an branch chhunga infiamna lama hmingṭhate chawimawina hlan a ni.