Khawthlang kawng chhia vangin buhfai phur truck-te tlan duh lo

Mizoram Truck Driver's Association (MTDA) General Headquarters chuan thuchhuah siamin, Mizoram khawthlang lamah kawng chhia vanga an lirtheite a chhiat nasat avangin, October 2 aṭangin kawng chhia siamṭhat a nih hma chu buhfai phura tlân loh an tum thu an tarlang.

Thuchhuahah hian MTDA general secretary Lalhmudika Tochhawng chuan, Mizoram khawthlang lam kawng chu hun rei tak a chhiat tawh thu a tarlang a, "Mipuite mamawhna avangin engtin tin emaw kan tlan hram hram ṭhin a, tun dinhmunah tlan hleih theih loh khawpin a chhe zual,"a ti.

MTDA chuan, kawng chhia vangin an lirtheite a chhiat nasat thu tarlangin, "Nunna atan pawha hlauhawm a nih tâk avangin kawng hi tlan ngamna khawpa siam a nih hma chuan keini buhfai phurte chu October 2, 2025 aṭang hian kan tlan ngam tawh lo tih mipuite kan inhriattir a ni," a ti a; mipui hriatthiamna an dil thu a tarlang.