KHAWTHLIR

PYD-in thisen pe

Siaha khawpuia UPC (NEI) kohhran hrang hranga Pentecostal Youth Department-te chuan nimin khan PYD Social Work Day pualin Siaha District Hospital-ah thisen unit 20 an pe. Thisen petute hi District Headquarters aṭangin mi pariat, Meisatla PYD aṭangin mi 10 leh Council Vaih PYD aṭangin mi pahnih an ni.

CM-in ṭanpuina pe

Chief minister Lalduhawma chuan nimin zing khan Lawngtlai aṭanga Aizawl lam pana a haw pahin Thingfal (Mamte) BCM biak-in, tun hnaia leiminin a tihchhiat chu a tlawh a, ṭanpuina atan kohhran hruaitute hnenah Rs 20,000 a hlan.

Seva Pakhwada

BJP, Mizoram Pradesh chuan nimin khan Seva Pakhwada (Intellectual Meet) an buatsaih. Mizoram University-a economist Dr James LT Thanga'n 'Viksit Bharat, GST Reforms, Ease of Doing Business' tih thupui a sawi a; PC Lawmkunga, IAS (Rtd)-in Atmanirbhar Bharat chungchang a sawi bawk.

Taksa leh rilru hriselna inzirtir

Mission Foundation Movement leh Ramhlun Vengthar Branch YMA chuan nimin zing khan Ramhlun Vengthar YMA Hall-ah Youth Wellness Campaign thawh hnihna an buatsaih a, naupang leh tleirawl mi 72 an tel. Campaign hi Ramhlun Vengthar YMA president Vanlalhruaia Khiangte-in a kaihruai a, resource person HL Rinawma'n taksa, rilru leh thlarau hrisel pawimawhna a zirtir a ni.

Gram sabha

Nimin khan 'Sabki Yojana, Sabka Vikas' tih thupuia hmangin Aadi Karmayogi Abhiyan hnuaia Village Vision leh Action Plan 2030 hmalakna tura thlan Dilkawn khuaah vantlang inkhawm - Gram Sabha neih a ni. He hun hi Champhai SDO (Sadar) Chandrakant Bagoria leh BDO Dr Vanlalnunpuii Ralte ten an hmanpui a, hmalak dan tur hrang hrang sawiho a ni.