Hmar Students' Association-in Freshers' Social an hmang

Hmar Students' Association (HSA) Joint Headquarters, Aizawl chuan nimin khan Art & Culture Auditorium, Berawtlangah Hmar Students' Association Day vawi 87-na lawmna leh Freshers' Social an hmang a; Assembly speaker Lalbiakzama khuallian a ni.

Speaker Lalbiakzama chuan, HSA member-te chu rilru puitling tak pu turin a chah a, "Hmar hnam hi Zo fate ram delh chinah chuan a dai dotu in ni a, in awmnaah hian awm ta lo ula hei ai hian Zo fate ram luah chin a zîm dawn tih a chiang em em a ni," a ti.

Zirlaite chu an rilru a la thianghlim thu sawiin Lalbiakzama chuan, "Dâwngdahna leh nuamtâwlna hmangin in tichhe tur a ni lo. Lehkha zirna sala tàn hi saltànna zawng zawnga hlâwk ber a ni a, nangmahni leh Zo fate kan din chhuahna atana thil pawimawh tak a ni," a ti a; tih hrâm hramna tel lo chuan hlawhtlinna a awm loh thu a sawi.

Inkhawmah hian Hmar mite zinga eizawnna leh zirnaa hlawhtlingte hnenah chawimawina hlan a ni a; khualzahawm 3rd Battalion MAP commandant Lalringdika pawhin thu a sawi a ni.

HSA hi October 3, 1939 khan Imphal, Manipur-ah din a ni a, Mizoramah chuan July 13, 1986 khan din a ni.