National Wildlife Week hman a ni

National Wildlife Week (October 2-8) chu nimin khan Assembly Annexe conference hall-ah Environment Forest & Climate Change (EFCC) minister Lalthansanga'n a hawng. Minister chuan, Aizawl Western Bypass Road laih mekah EFCC department-in ramsate thlamuang taka an awm theihna tur a ngaih pawimawh thu a sawi.

Minister Lalthansanga hian ‘Illustrated Poster of Rengdil Lake Biodiversity’ a tlangzarh a; National Wildlife Week puala high school/higher secondary school zirlaite puala lemziak leh thlalak intihsiaka ti ṭhate hnenah lawmman a sem.

EFCC Minister chuan, Mizorama ramsa leh nungchate humhalhna tura EFCC department hmalaknate fakawm a tih thu sawiin, "Aizawl Western Bypass Road laih mekah EFCC chuan ramsate thlamuang taka an awm theihna tur a ngai pawimawh. Wildlife Protection Act, 1972-in a humhalh ramsate kah hi dan anga na taka hrem theih a nih avangin Mizote pawhin rannung kah leh sa pelh kan sim a pawimawh," a ti a; ramsate leh nungchate humhalhna tura sorkarin dan a siamte zâwm ṭheuh turin kal khawmte a chah.

India rama ramsate humhalh nan sokar laipuiin 3rd National Wildlife Action Plan 2017-2031 a duan thu sawiin Lalthansanga chuan, "Mizoramah pawh he Plan hi ṭha taka kalpui a pawimawh. Mihringte leh ramsate hi kan inmamawh tawn avangin kan awmna ṭheuhah inrem taka cheng za a, ramsate tana hnawk lo zawnga mihringte kan awm thiam a ngai," a ti.

Wildlife Week hmannaah hian EFCC secretary Sudhir Kumar, principal chief conservator of forest Ravi Horo leh chief wildlife warden MZ Singson te pawhin thu an sawi a; Mizoram University Zoology department HoD Prof. HT Lalremsanga leh PhD scholar Amit Kumar Bal ten ‘Status of wildlife in Mizoram and its need of conservation’ tih thupui an sawi.

National Wildlife Week hi kum 1955 aṭangin India ram pum huapin October 2-8 chhung hman ṭhin a ni a; kumin hi Week vawi 71-na niin, thupui chu 'Human - animal coexistence' tih a ni. Wildlife Week hi Mizorama district dangahte pawh hman a ni bawk.