Changkanna leh hausakna ṭhang zelah khawtlang nun ngaihthah a thiang lo - CM

Chief minister Lalduhoma chuan, khawvel changkanna leh hausakna ṭhang chho zelah khawtlang nun ngaihthah a thiang lo tih sawiin, YMA chu khawtlang nun venghimtu tur a nih thu a sawi.

Nimina Buangpui community hall-a Buangpui Branch YMA golden jubilee lawmna a hmanpuinaah thu sawiin CM Lalduhoma chuan, "Infrastructure leh technology lamah te, sum leh pai lamahte sang chho zel mah ila, khawtlang nun hi kan ngaihthah a thiang lo a, ṭhangtharte nun a tlakchhiat zel si chuan kan hnam hi a zuih ral mai ang tih a hlauhawm," a ti.

Lalduhoma chuan, "YMA hian a dinna khua apiangah ṭhangtharte hnena Zo nun ze mawi zirtirna leh kaihhruaina hi a kalpui tur a ni a, tlawmngaihna te, aia upa zahna te, ṭanpui ngaite ṭanpuite hi kan chhawm nung zel tur a ni," a ti a; YMA chu khawtlang nun leh ṭhangtharte venghimtu tur a nih thu a sawi.

Chief Minister chuan, hnam zia, nunphung leh tih dante vawnhim leh tihhmasawn kawngah thâ thlah a thiang lo tih sawiin, "Kan ṭawng te, kan thu leh hla te, kan kutthemthiam thil te, kan hmun hlui te, kan history pawimawhte venhim hna kan thawh a ngai. YMA hi pawl zahawm leh thianghlim, mi zawng zawng lenna a ni a, Mizo hnam hui khawmtu, Kristianna pên bosan si loa Zo nun ze mawi chhawm nungtu leh zirtirtu a ni," a ti.

Inkhawm hi Buangpui Branch YMA president H Lalbiaksanga'n a kaihruai a, Central YMA president Lalhmachhuana pawhin thu a sawi. Buangpui Branch YMA hi kum 1975-ah din a ni a, member 358 an awm mek a ni.