MJA-in IPR Director kal chhuak thlahna leh Director thar lawmpuina an hmang

Mizoram Journalists' Association (MJA) Gen. Hqrs chuan nimin khan Information & Public Relations department director kalchhuak C Lalnunkima thlahna leh director thar K Vanlalsangi lawmpuina Aizawl Press Club-ah an hlan.

IPR director-te puala inkhawm hi MJA treadurer Lalrinmawia Sailo-in a kaihruai a; MJA president C Lal-rambuatsaiha'n IPR director kalchhuak C Lalnunkima hnenah ngaihhruina thuchei a hlan a, director thar K Vanlalsangi hnenah lawmpuina thuchei a hlan bawk.

C Lalnunkima hi September 30, 2025 khan superanuation pension-in a chhuak a, K Vanlalsangi hian October 2025 aṭangin IPR department director mawhphurhna a la ṭan a ni.

MJA president C Lalrambuatsaiha chuan, sorkar hnathawk tam tak zingah an pension hun nghak chhuak zo loa mual liam ta eng emaw zat an awm karah C Lalnunkima'n pension thlenga a hna tluang taka a thawk thei chu a lawmpui thu leh, IPR director a nih chhunga MJA nen thawhhona ṭha tak an nei chu lawmawm a tih thu a sawi.

IPR director thar K Vanlalsangi a lawmpui thu sawiin MJA President chuan, IPR department leh MJA ten thawh dunna ṭha tak an neih chu chhawm nun zel a duh thu a sawi a; ram rawng a bâwl zelna turah ram leh khawtlang tan theihtawp chhuah tura ngenin duhsakna a hlan.

Director kalchhuak C Lalnunkima chuan, IPR department-ah kum 38 leh thla 10 a thawh chhung leh director hna kum 3 leh a chanve a thawh chhungin MJA nen thawhhona ṭha tak an neih thu sawiin, MJA-in amah thlahna hun an buatsaih chu a lawm thu a sawi.

IPR director thar K Vanlalsangi pawhin thu sawiin, director a nih chhungin MJA nen thawh dunna ṭha tak an neih a beisei tih a sawi a; a mawhphurhna hlen turin theihtawp chhuah a tum thu a sawi bawk.