Waste-to-Art Fashion Show buatsaih

UDPA department, Kolasib chuan October 2, Ningani khan Kolasib-a UDPA conference hall-ah bawlhhlawha chang mai tur thilte hmanga thil siamte pho chhuahna, Waste-to-Art Fashion Show an buatsaih a; Pradhan Mantri Awas Yojana (PMAY) Mela a buatsaih nghal bawk.

Fashion Show hi UDPA department leh August 19 Fashion School ṭang dun buatsaih a ni a, Solid Waste Management Centre aṭanga bawlhhlawh lâk khawm aṭanga siam thawmhnaw leh incheina chi hrang hrang pho lan a ni.

UDPA department-in Kolasib-a UDPA confe-rence hall-a Waste-to-Art Fashion Show leh PMAY Mela an buatsaih hi Swach-hata Hi Seva (Faina Hapta) pual a ni a, district bawrhsap Robert C Lalhmangaiha khuallian niin, district urban development officer Josephine Zonunsangi'n a kaihruai.

Bawrhsap chuan, bawlhhlawhte chu thil ṭangkai leh hlu taka chantir theih a nih thu sawiin, "Vawiin hun buatsaih hi fai chungchanga inzirtirna zau zel theihna atana kawng thar dangdai leh ṭha tak a ni. Swachhata Hi Seva hi rawngbawlna a ni a, hemi puala campaign hi Kolasib Ddistrict-ah chhunzawm zel a ni dawn," a ti a; khawpui fai leh mawi taka siam tura ṭan la zel turin Kolasib mipui a sáwm.

Inkhawmah hian Kolasib district-a Best Sanitation Worker leh Best Sweeper atana thlante hnenah lawmman hlan a ni.