KHAWTHLIR

JB-in thisen pe

J Buana College NSS chuan nimin khan Civil Hospital, Lunglei leh Christian Hospital tan thisen unit 75 an pe. Lunglei Civil Hospital tan hian unit 39 an pe a, Christian Hospital tan unit 36 an pe a ni.

Heroin man

Assam Rifles leh Lunglei Police te chuan October 2, Ningani khan Lunglei Bazar Vengah heroin (no. 4) gram 62.56 an man. Ruihhlo neitua puh mi pathum - B Daniel (29) s/o Bono Kumar Chakma, Ujhol Chakma (35) s/o Yogakumar Chakma leh Kajala Devi Chakma (26) w/o Ujhol Chakma, Lunglei Bazar Venga cheng nia insawite an man nghal bawk.

Kawng khâr dawn

Sakawrtuichhun aṭanga Lungverh panna kawngah pipe phûm a nih dawn avangin Traffic SP Ruatsanga Ralte chuan thuchhuah a siam a; zanin dar 7 aṭanga naktuk zan dar 7 thleng pipe phûm hna thawh a nih dawn avangin Sakawrtuichhun aṭanga Lungverh panna kawng khar tur a nih thu a tarlang.

Zotlang Futsal Ground hawng

AMC Ward-X corporator Chuauzikpuii Pachuau-in AMC fund leh Property Tax return hmanga a siam Zotlang Futsal Ground chu nimin khan a hawng. Futsal Ground hi a dung ft. 43 leh a vâng ft. 23 niin, phûllem phah a ni a; Corporator fund Rs 17,22,200 leh Property Tax return Rs 15,00,000 hmanga siam a ni. Bul ṭan tirhah bialtu MLA ṭhin Zothantluanga fund Rs 5,06,353 hman a ni bawk a, Zonunmawia te chhungkuain pavillion sakna atan Rs 3,00,000 an thawh bawk.

MHIP jubilee lawm

MHIP, Ruantlang Branch chuan nimin khan an golden jubilee lawm kharna hun Vanhnuailiana Hall-ah an hmang a, bialtu MLA Lt.Col. Clement Lalhmingthanga khuallian niin, bialtu MLA hlui TJ Lalnuntluanga khualzahawm a ni. Ruantlang MHIP hi kum 1975-ah din a ni a, golden jubilee hi October 2-3, 2025 chhung an lawm a ni.