Minister-in leivûng a paihna hmunah chauh paih turin kawng laitute a hrilh

Public Health Engineering minister Prof. Lalnilawma chuan nimin khan tlak lama Aizawl khawpui hêlna tur Muallungthu-Sihhmui inkar kawng (Aizawl Western Bypass Road) laih mek a tlawh a; kawng laihna vûngte a paihna tura siam (spoil bank)-ah chauh paih turin hna thawktute a chah.

Prof. Lalnilawma chuan, Aizawl Western Bypass road laih hna thawktu RG Buildwell Engineers Ltd. hotute chu hna an thawhnaah leilung leh a chhunga awmte tichhe tam lo zâwnga fimkhur taka thawk turin a chah a; leivûngte chu a paihna tura siam spoil bank-ah chauh paih ṭhin turin a hrilh. Leivûngin Aizawl khawpui châwmtu Tlawng lui tui a tihbawlhhlawh loh nan leh nghawng ṭha lo a awm loh nan hma la turin hnathawktute a chah bawk.

PHE Minister hi PHE bakah, PWD leh Environment, Forest and Climate Change department hotute leh Aizawl DC aiawhte'n an ṭawiawm. Hmalakna kal mekte leh harsatna awm theite sawiho a ni a; hnathawhte vila enkawl zui turin a kaihhnawih department hrang hrang leh tlawmngai pawlte telna committee din an rêl.

Aizawl Western Bypass Road hi PM-DevINE hnuaia hmalakna niin, km. 46-a thui tur a ni a; Mual-lungthu khaw dâi aṭanga pêng ṭanin, Sihhmui a pawh dawn a ni.