PHC 3-in NQAS an hmu thar

Mizorama primary health centre pathum - Phullen PHC, Hnahlan PHC leh Reiek PHC te chu National Quality Assurance Standards (NQAS)-ah an tling thar a; heti hian Mizorama sorkar damdawi-in 47-in NQAS national certificate an hmu tawh.

National Health Mission, Mizoram tarlan danin, India rama sorkar damdawi-in ṭha bik tehna NQAS-ah hian Hnahlan PHC-in 93.36%, Reiek PHC-in 90.76% leh Phullen PHC-in 90.68% an hmu a ni. Heti hian Mizorama sorkar damdawi-in 47-in NQAS national certificate an hmu tawh a ni.

Tunah hian sorkar damdawi-in dang 19-in state level certificate an nei tawh a, damdawi-in pali-in national certificate result an nghak mek.

NQAS national certification hmu tur hian endikna chhawng thum paltlang a ngai a, endikna hnuhnung ber chu National External Assessment tih niin, state pawn aṭangin endiktu (assessor) an kal ṭhin. Endikna tawpah 70% hmu tlingte hnenah national certificate pek ṭhin a ni.