KHAWTHLIR
Thisen pe
October 4, Inrinni khan KṬP, Sakawrtuichhun Bialin Synod Hospital tan thisen unit 52 an pe a, petute mipa 43 leh hmeichhia pakua an ni a; Catholic Ṭhalai Pawl, City Parish Coordination-in ZMCH tan unit 52 an pe a, petute mipa 46 leh hmeichhia paruk an ni. ṬKP, Lunglei Chanmari Bial member mipa 32 leh hmeichhia pasarihte'n BCM Ramthar Kohhran Centenary Hall-ah Civil Hospital, Lunglei tan thisen unit 39 an pe bawk.
Milim paih phal lo
Aizawl bawrhsap Lalhriatpuia chuan hriattirna a tichhuak a, phalna nei loa sakhuana leh kût kaihhnawih lawmna leh inthawina atana milim leh a kaihnawih thil dangte lui leh dila chiah leh paihte pha a nih loh thu a puang a; phalna nei loa paihte chu kum 5 thleng lung-in tàntir emaw, Rs 1,00,000 thleng chawitir emaw, a pahnih emawa hrem theih an nih thu a tarlang. District Bawrhsap leh AMC chhungah Municipal Commissioner hnenah phalna dil hmasak tur a nih thu a tarlang bawk.
Sunday school meet
UPC North East India kohhrana General Sunday School department chuan October 4, Inrinni khan Vanapa Hall-ah Aizawl City Sunday School Meet an buatsaih a, Aizawla pastor bial hrang hrang aṭangin sunday school naupang 300 vel an tel. Inkhawm hi General Sunday School director Rev. Biaksangzuala'n a kaihruai a; Dr Lalhmasai'n 'Incheinaa thianghlimna' tih a zirtir a, MSACS hnuaia counsellor Dr Lalhmingchhuani'n 'Mipat hmeichhiatna hman kawnga thianghlimna' tih thupui a sawi.
Tlan loh hun siamrem
Traffic SP Ruatsanga Ralte chuan October 6, 2025 - February 13, 2026 chhung atan Aizawla lirthei tlan loh nía a hun rei zawngah hriattirna a tichhuak a; lirthei tlan loh nía tlan phal loh hun chhung chu zing dar 9:30 aṭanga tlai dar 5 thleng a ni dawn. Lirthei intlan chhâwk hian Inrinni, Pathianni leh sorkar chawlh ní te a huam lo.
HM-in tlawh
Home minister K Sapdanga chuan October 4, Inrinni khan Vairengte Police Checkgate a tlawh. Minister hian Vairengte Police checkgate hmunhmate leh hnathawhna hmunte a fang a; theihtawp chhuaha ramri venhim hna thawk zel turin police-te a chah a ni.