Mizoramah chawlhkar hnih chhungin mi 73,847 hriselna dinhmun enfiah

Kumin September 17 aṭanga October 2 thleng khan Mizoramah Swasth Nari, Sashakt Parivar Abhiyan (Healthy Woman, Empowered Family) campaign leh Rastriya Poshan Maah campaign neih a ni a; campaign chhungin mi 73,847 hriselna dinhmun enfiah a ni.

Sorkar thuchhuah tarlan danin, Swasth Nari, Sashakt Parivar Abhiyan campaign neih chhungin Mizoramah health camp vawi 4,224 leh special camp vawih 627 neih a ni a; camp-ah chuan mi 73,847 hriselna dinhmun enfiah niin, chu'ng zinga mi 38,145 chu hmeichhia an ni.

Campaign chhungin PMJAY/Vay Vandan Cards (Health Card) mi 1,645 hnenah pek chhuah a ni a, hmun hrang hrangah blood donation camp buatsaih niin, thisen unit 1,753 pek a ni.

Swasth Nari, Sashakt Parivar Abhiyan campaign Rastriya Poshan Maah vawi riatna campaign hi September 17, 2025 khan prime minister Narendra Modi-a'n Dhar, Madhya Pradesh aṭangin a hawng a; hemi rual hian Mizoramah Larsap Gen. Dr Vijay Kumar Singh-a'n a hawng ve bawk.

Healthy Woman, Empowered Family-in a tum ber chu - chhungkaw nu ber aṭanga hriselna bul ṭan a ni a; October 2, 2025 thlenga campaign chhungin hmeichhiate hriselna lam hawi inzirtirna huaihawt niin, damdawi-in, health & wellness centre leh sub-centre-ahte health camp leh check-up neih ṭhin a ni.

PMJAY, PMMVY leh Nikshay Mitra enrollment kalpui niin, Ayushman Bharat Health Account (ABHA) identity card siam a ni a; naupangte hnena hri danna (vaccine) pek, BP sang, zunthlum, hnute cancer, anaemia leh ngawr vei zawn chhuah te, AYUSH awareness, oral health leh blood donation camp-te buatsaih a ni bawk.