Vairengte Excise gate-a thawkte Excise Minister-in tlawhin a fuih

Excise & Narcotics minister Lalnghinglova Hmar chuan October 4, Inrinni khan Vairengtea Excise Check Gate a tlawh a; tun hnaia Excise & Narcotics-a thawkte ṭhahnemngaihna zarah ruihhlo man a pung tih sawiin, fimkhur leh taima taka thawk zel turin a chah.

Lalnghinglova Hmar chuan, sorkarin Excise & Narcotics department a ngai pawimawh tih sawiin, "Kum 2024 chhung khan district thar Saitual, Khawzawl leh Hnahthial-ahte Excise Station hawn a ni. Department thuam chak lehzual nan post thar 12 siam a ni a, thawktu indaih lohna phuhru turin direct recruitment hmangin mi 16 lak a nih tawh bakah, mi dang 33 lakna tur a kal mek," a ti a; chak zawka hna thawh a nih theih nan sorkarin END chu lirthei 18 a leisak thu leh lirthei pathum a pek thu a sawi.

Mizoram Police leh YMA-te nen ṭanghoa ‘Ruihhlo do beihpui’ thlak mekah END-in mawhphurhna lian tak an neih thu sawiin Excise Minister chuan, "Sorkarin min duhsak a, kawng hrang hrangin department min thuam chak a, chumi thungrûl tur chuan ṭha zawka kan thawh a ngai. Vairengte hi hmun danga Excise awmte aia langsar a nih avangin fimkhur leh taima takin thawk zel ang che u," a ti.

Vairangte Excise & Narcotics Station-ah hian inspector Malsawmdawngzela hoin sub-inspector pahnih, head constable pahnih, wireless operator pahnih leh constable 11 an awm mek a ni.