Kumin chhungin Oline RTI hmangin Information dilna 6,572 a lut tawh

Right to Information Act, 2005 hmangin mipuite'n kuminah Mizoram Online RTI kaltlangin zawhna 6,572 an zawt tawh a; thla kal mek October-ah ni li chhungin Online RTI-ah hian zawhna 96 a lut tawh.

Mizoram Information Commission tarlan danin, kumin bikah January 1 aṭanga October 4, Inrinni thleng khan Online RTI kaltlangin sorkar department/board/office hrang hrangte'n zawhna 6,572 an dawng tawh. Tun October thla bikah ni 1-4 chhungin online kaltlangin RTI zawhna 96 a lut tawh bawk a ni.

RTI Act Second Schedule hnuaiah ram venhimna kaihhnawih thilte chu mipuiin information dil theih mah se, pek loh theih (exemption) a ni. Exemption awm zingah hian sorkar laipui hnuaia intelligent leh security organisation 22 an tel a; Mizoram sorkar hnuaia exemption pek zingah CID Special Branch, District Special Branch leh Narcotic Cell-te a tel.

Hengah hian thubuai chhui lai tibuai thei tur a nih chuan chhanna pek loh theih a ni a; chutih rualin, thawktute eirukna kaihhnawih leh mihring dikna chanvo (human right) bawhchhiatna lam thilah chuan RTI Act-a exemption-in a huam lo thung.