Aizawla rimawi nena mitdel kutdawhte dinhmun ngaihtuah turin sorkar ngen

Mizoram Blind Society (MBS) chuan, MBS hriatpuia Aizawla mitdel khawlaia rimawi hmanga zaia kutdawh ṭhin mi pakua an awm thu an tarlang a; chu'ng mite chu The Mizoram Prohibition of Beggary Bill, 2025-in a khap dawn a nih chuan, a taka dan hman hmain an eizawnna tur ngaihtuahsak hmasa turin sorkar an ngen.

MBS chuan, tun hnaiah Legislative Assembly-in ‘The Mizoram Prohibition of Beggary Bill, 2025’ a pawm tak chu ram leh khawpui hmasawnna atan thil ṭha tak nia an hriat thu an tarlang a, "Amaherawhchu, mitdel ṭhenkhat, eizawnna mumal nei lo leh chhungte enkawltu mumal nei tawh lo te, Mizoram leilung fa dik tak ni bawk si rimawi hmanga bazar leh khawlai hmun remchanga zaia eizawng ṭhinte dinhmun hi ngun zawkin sorkar hian ngaihtuahsak se kan duh hle," an ti.

Hemi chungchangah hian MBS chuan Chief Minister, Social Welfare Minister leh Director te hnenah ziakin Memorandum an thehlut tawh a; chutah chuan MBS hriatpuia Aizawl khawlaia zaia kutdawh ṭhinte mi pakuate hming pawh an ziak lang a ni.

Rimawi hmanga kutdawh mi pakuate chungchang chu The Mizoram Prohibition of Beggary Bill, 2025 kenkawh a nih hmain an eizawnna tur mumal takin sorkarin ngaihtuah hmasa se an duh thu MBS chuan an tarlang a, "Social Welfare, Women and Child Development Department hian heng mitdel, rimawi hmanga zaia eizawng mi 9 kan tarlante hi an chhungte nen special consultation meeting neihpuiin, sorkarin a chhawmdawlna a pek theih dan tur kawng sawipui se la a ṭha hle ang," an ti.

MBS chuan, Mizoram sorkar department hrang hrangin thawktu an lakah Right of Persons with Disabilities Act, 2016-in a sawi angin 4% aia tlem lo chu rualbanlote tan dah zel a ni tawh tih an sawi a; chu'ngah chuan mitdel khawlaia zaia eizawng ṭhinte thawh theih àwm a awm a nih chuan duhsakna pek theih ni se an duh thu an tarlang.

Mitdel kutdawh mi pakuate chu an eizawnna tur sorkarin a ngaihtuahsak thei lo a nih chuan, Mizoram Prohibition of Beggary Bill, 2025 hman a nih hunah pawh huamtir ve lo se an duh thu sawiin MBS chuan, "Street performer pakhat angin dah thei mai se la, Social Welfare, Women and Child Development Department hian ID siamsak se la a ṭha hlein kan ring," an ti.