Scholarship sem mek a ni - Education Minister

Education minister Dr Vanlalthlana chuan October 3, 2025 khan a pisaah Mizo Zirlai Pawl (MZP) General Headquarters office bearer tharte a kâwm a; zirlaite scholarship chungchangah sorkarin nasa taka a nawr zarah scholarship la dawng lote hnenah sem mek a nih thu a sawi.

Dr Vanlalthlana chuan, sorkarin nasa taka a nawr hnuah scholarship sem ṭan a nih thu MZP hruaitute a hrilh a, "Kum 2023-24 chhunga mi chu sem zawh tawh a ni a, kum 2024-25 chhunga mi sem hmabâkte pawh sem chhunzawm zel a ni dawn. Aadhaar seeding la ti lote pawh an bank account-ah a luh vat theih nan an buaipui vat a ṭul a ni," a ti a; MZP nen thawhhona ṭha tak neih zel a beisei thu a sawi bawk.

MZP president Dr C Lalremruata chuan, School Education department leh Higher & Technical Education department chu MZP tan nodal department an nih thu a sawi a, "Zirna leh ram leh hnam thilah ṭha takin sorkar kan thawhpui dawn a, a ṭul a nih chuan sorkar dik lohna pawh sawi hreh kan nei dawn lo," a ti.

MZP President hian MZP-in hmalak an tum dante a sawi a; theihtawp chhuahpui turin Education Minister a ngen a ni.