Poshan Maah Motorcycle Rally

Nu leh naupang tana chawṭha pawimawhzia inzirtirna, Rashtriya Poshan Maah pualin Aizawl Urban ICDS Project leh Tlangnuam ICDS Project chuan October 4, Inrinni khan Aizawl Thunders Motorcycle Club nen ṭang dunin Motorcycle Rally an buatsaih a; hriselna chungchanga nu leh nau enkawlnaa mipate mawhphurhna pawimawhzia puanzar a ni.

Motorcycle Rally hi New Capital Complex Anganwadi Centre-ah Women & Child Development joint secretary Zonunthari'n a vailiam a, Hlimen Anganwadi Centre V-ah tawpna hun hman a ni.

Rally-ah hian nu nau pai, naupang, chhungkaw hriselna, ei leh in ṭha ei chungchang leh in chhunga mawhphurhna hrang hranga mipate pawimawhna chungchang inzirtir a ni a; Rally-a telte chuan mipate mawhphurhna hlen kawnga hma la tura intiamna thu an sawi rual bawk.