Mizoramah thla 9 chhungin zikserh vei 7,321; Health worker 100 lak tum a ni - Rinpuii

8th October, 2025

Mizoramah kumin January - September thla chhung khan sikserh (malaria) vei mi 7,321 hmuh chhuah a ni a, sikserh vangin mi paruk an thi. Health & Family Welfare minister Lalrinpuii chuan, sikserh donaa a hmatâwng tur health worker 100 lak tum mek a nih thu a sawi.

Nimin khan Assembly Annexe conference hall-ah ‘3 Day Regional Review Meeting on Malaria Elimination for GFATM Project States’ neih a ni a, HFW Minister-in a hawng. Meeting-a tarlan danin, kumin January- September thla chhung khan Mizoramah sikserh vei mi 7,321 hmuh chhuah an ni a, hmuh tam berna Lawngtlai district-ah mi 3,151 hmuh chhuah niin, hmuh tlem berna Kolasib district-ah mi 24 hmuh chhuah a ni. Kumina sikserh vanga thi mi paruk chu Champhai leh Lawngtlai district-a mi pathum ve ve an ni.

Health Minister chuan, Mizoram chu India rama sikserh vei awm tamna ber a nih tsawiin, "Sikserh tihrêm kawngah tha thara beih a ngai a, inhrilhhriatna ṭha leh invenna inzirtir kawngah ṭan lak a ngai hle. Kum 2024 aiin kumin 2025-ah sikserh vei leh thihpui tlem deuh mah se, state dang nena khaikhin chuan ngaimawh tham a la ni. Sikserh do kawnga a hmatawng tur health worker 100 lak tum mek a ni," a ti.

Sikserh do tur hian khawtlang leh tlawmngai pawlte nena ṭanrual a ṭul thu sawiin Lalrinpuii chuan, "Mizorama district palite chu category 3 (high endemic) a la ni a, sikserh vei tharte zinga 80% dáwn chu he’ng district a'anga hmuh chhuah an ni," a ti a; review meeting-ah Mizoram thlen chin enfiah a ni dawn a, sikserh nuai bo dan tur ṭha zawk duan a nih a beisei thu a sawi.

Review meeting hi National Vector Borne Disease Control Programme (NVBDCP) buatsaih a ni a, state hrang hrang aṭangin vector borne disease lama thawk mi 70 vel an tel. Health secretary H Lalengmawia, NHM mission director Dr Lily Chhakchhuak, NCVBDC additional director Dr Pranab Jyoti Bhuyan te pawhin thu an sawi a ni.

MIZORAMA SIKSERH DINHMUN

◆ India rama sikserh hluar berna state a ni mek.

◆ Lunglei, Lawngtlai, Mamit leh Siaha district-te chu sikserh tamna district a ni.

◆ Jan-Sept. 2025 chhungin Mizoramah sikserh vei mi 7,321 hmuh a ni.

◆ Kumin 2025-ah sikserh vangin mi 6 an thi tawh.

◆ Kum, 2024 chhung khan Mizoramah sikserh vei mi 16,899 hmuh chhuah a ni a, mi 7-in an thihpui.