RIPANS Graduation leh Lamp Lighting

Regional Institute of Paramedical and Nursing Sciences (RIPANS) chuan nimin khan an auditorium-ah zirlai chhuak turte thlahna 25th Graduation leh Lamp Lighting Ceremony an buatsaih a, Governor Gen. Dr Vijay Kumar Singh-a'n hmanpuiin, zir zoa chhuak turte chu inpekna nena thawk ṭhin turin a chah.

Governor chuan, zirlai hlawhtlingte a lawmpui thu sawiin, Graduation Day chu thawhrimna leh inpekna lan chhuahna leh mite tana rawngbawlna, lainatna leh mawhphurhna lantir tura bul ṭanna a nih thu a sawi a, "Mi dang tana malsawmna ni tura rawngbawlna dik tak, lainatna leh ngaihsakna behchhan a ni. Eizawnna atan maia hmang loin, mi dang tana rawngbawlna zahawm leh ngaihsanawm berte zinga mi a ni tih hriaa inpekna nena thawh ṭhin tur a ni," a ti.

RIPANS chu India hmarchhaka hriselna lam inzirtirna hmun pawimawh a nih thu sawiin Larsap chuan, "India ram bakah, ram pawn thlenga thawk tur mithiam chher chhuaktu a ni thei hi a chhuanawm," a ti a; RIPANS-a khum 100-awmna damdawi-in sak chuan Mizorama hriselna lama inenkawlna a tihchangtlun dawn thu a sawi.

Gen. VK Singh chuan, RIPANS zirlaite chu healthcare global ambassador an nih thu sawiin, hmingṭhatna vawng him zel turin a chah a; damlote'n an lakah beiseina sang tak an neih avangin rinaawmna leh hmangaihna nena an mawhphurhnate ṭha taka hlen ngei turin a fuih bawk.

Governor hian kumina final exam-a RIPANS-a MSc (Nursing), B.Pharm, M.Pharm, BMLT, MMLT, B.RIT leh B.Optom-a gold medalist-te hnenah medal leh thuchei a hlan a ni.

Graduation leh Lamp Lighting Ceremony-ah hian RIPANS director Dr Sanjay D Sawant pawhin thu a sawi a; Greenwood Hospital-a nursing superintendent Lalruatkimi Renthlei kaihhruaiin B.Sc Nursing zirlai tharte'n khawnvar an chhit bakah thutiam an chham rual bawk.

RIPANS hi March 30, 1995-ah din a ni a, department pasarih - Nursing, Pharmacy, Medical Laboratory Science, Optometry, Radio Imaging Technology, Physiotherapy leh PG Diploma in Nutrition and Dietetics a awm. Zirna programme - post graduate pali, post doctoral pakhat, under graduate paruk leh post graduate diploma pakhat a awm a, zirtirtu 51 leh non-teaching staff 109 an awm mek..

RIPANS-ah hian kuminah under graduate-ah mi 173 leh post graduate-ah mi 45 hnenah degree hlan a ni a; a din tirh aṭanga kumin thlengin UG-ah mi 2,815 leh PG-ah mi 166 an inzir chhuak tawh a ni.