Software technology park din turin ngen

Information & Com-munication Technology (ICT) minister Dr Vanlalthlana chuan nimin khan Union Electronics and Information Technology minister Ashwini Vaishnaw chu a pisaah a kâwm a; Mizorama Software Technology Park of India (STPI) changtlung zawka din vat a nih theih nana hma lakpui turin a ngen.

Dr Vanlalthlana chuan, Mizoramin human resource a neih ṭhat thu leh digital literacy-a a sanna chu ṭangkai zawka hman a nih theih dan tur Union Minister a sawipui a, "Rei lo teah Mizoram Engineering College-ah class ṭan turin hmalak a ni a, National Institute of Technology (NIT) Mizoram campus, Lengpuia din tur pawh hun rei tak chhunga chawlh a nih hnuah hna thawh chhunzawm leh thuai a ni dawn," a ti.

Mizorama IT hub din a nih theih nan leh software export leh IT incubation centre kalpui a nih theih nan STPI changtlung tak Mizoramin a mamawh thu ICT Minister hian Ashwini Vaihsnaw hnenah a thlen a; Union Minister chuan Mizorama hmunhma awmte a hmuna an en vat tur thu sawiin, a rang hma lakpui theih ngei a beisei thu a lo hrilh.

Mizorama STPI centre neih mek chuan Ch. Chhunga Bus Terminal Building, Ṭhuampuia mi luahin kum 2018-ah din ṭan a ni a; Centre of Entreprenuership (CoE) kalpuiin gaming leh entertainment bikah bul ṭan tirte hma a lakpui ṭhin.

STPI hi India rama IT a ṭhan zel nana din niin, India ramah a inzarh pharh mek a, state leh union territory zawng zawngah din kim a la ni lo thung.