Industrial policy thar pahnih tlangzarh

Commerce & Industries minister F Rodingliana chuan nimin khan Vanapa Hall-ah ‘The Industrial and Investment Policy of Mizoram, 2025’ leh ‘The Mizoram Procurement Preference Policy for MSEs, 2025’ a tlangzarh. Minister chuan, department-te'n kum khat chhunga bungrua/service an lei tur aṭanga 25% chu policy tlangzarh tâk hnuaia inziak lutte aṭangin an lei ngei a ngaih dawn thu a sawi.

F Rodingliana chuan, Mizote zingah mahni siam ngaihsan lohna a lian ṭhin tih sawiin, "Mahni thar ngaihsan leh ngaihhlut thiam kan zir a ṭul tawh. Industry hi Mizoram dinchhuahna tur pawimawh a nih avangin ZPM sorkar chuan industry a ngai pawimawh," a ti.

CI Minister chuan, "The Mizoram Procurement Preference Policy for MSEs, 2025 hnuaia inziak lutte'n inziak lut ve lote aiin sorkara thil an hralh turah 12% china an chhanna a sang zawk a nih pawhin duhsakna pek an ni dawn. Bungrua/service lei tum sorkar department-te chuan kum khat chhunga an thil lei tur zawng zawng aṭanga 25% chu he policy hnuaia inziak lutte hnen aṭang hian an lei a ngai dawn," a ti a; dan hnuaiah engkim tih a nih avangin officer-te'n an lo hnâwl ngawt thei lo tih a sawi.

Policy pahnih tlangzarh tâk chu industry din tumte leh dintute tana hmasawnna tura duan a nih thu sawiin Minister chuan, "Industry din duh tak takte tan hma kan la a, industry din duhtute hnenah ram kan pe ang. Policy-in kan ûm zui ang a, pension awm lo, tu leh fate thlenga eizawnna ngêlnghet siamna turin kawng kan hawng. Sorkarin a tih theih chin tur a puang tawh a, ṭhalaite'n industry hmanga dingchhuak turin ke an pên a ngai a ni," a ti.

F Rodingliana chuan, Lengtê leh Luangmuala Industry rama hmunhma (plot) an siamṭhat mek thu sawiin, "Industry ramah ram âwl a tam em em a, mahse, industry din duhte tana ram kan zawnin a ram neitu an lo awm zel. Tunah hian Zuangtuia industry rama ram neitu mi 16 leh Luangmual industry ramah mi pasarih chu kan cancel tawh a, mi dang 30 kan ko tawh bawk," a ti a; industry ramah duh duhna hmuna industry din a nih tawh loh nan ruahmanna an siam thu a sawi bawk.