MYC leh Taiwan thawkho dawn

Mizoram Youth Com-mission (MYC) chairman Malsawmzuala Ralte leh OSD to CM Jonathan Lalremruata chu nimin khan India rama Taiwan ambassador Mumin Chen pisaah an lêng a, Mizo ṭhalaite Taiwan-a hna thawk tura an kal theih dan tur an sawiho.

Inkawmnaah hian India leh Taiwan-in hna thawk tur thawn chhuah kawnga inremna, India-Taiwan Labor Mobility Agreement 2024 hnuaiah Mizo ṭhalai 50 kumin chhunga Taiwan-a tirh ni se, an ti a ni. Taiwan-a thawk tur zawn, inremna ziah leh tul dang zawng zawng chu MYC-in a buaipui ang.

Taiwan-a hna thawk turin kum 18 chung lam, mipa leh hmeichhia, hriselna endik paltlangte an kal thei dawn a, an thawhna tur company-in kal man leh senso ṭul an tumsak dawn.

Taiwan sorkarin an rama hna thawkte enkawlna dan mumal leh changtlung tak, Protection of Foreign Workers Right in Taiwan an nei a, chumi hnuaiah chuan Mizo ṭhalai kal turte pawhin him takin hna an han thawk thei tura ngaih a ni.