Bawrhsap Award sem tur sawifiah

Lawngtlai bawrhsap Donny Lalruatsanga chuan nimin khan a pisaah thuthar thehdarhtute a kâwm a, 'Bawrhsap Award' buatsaih tur a sawifiah.

Lawngtlai DC sawi danin, Bawrhsap Award hi Lawngtlai khawpui chhunga village council 12 inelna tur a ni a, kum tin Republic Day-ah hlan ṭhin a ni ang. Pakhatnain Rs 1,00,000, pahnihnain Rs 70,000, pathumnain Rs 50,000 an dawng dawn a; VC pakhat tan consolation prize Rs 20,000 a awm bawk ang.

Donny Lalruatsanga chuan, Bawrhsap Award chuan faina leh thianghlimna bakah, khawpui felfai zawk din tura inelna thianghlim a thlen ngei a beisei thu sawiin, "Motor parking chungchangah LADC-in parking area a siam bakah motor dah ṭhin bànsan a hun tawh," a ti a, lirthei neitute fimkhur turin a chah.

Ran khuahkhirhah ṭan lak thar a ṭul thu sawiin Bawrhsap chuan, uluk zawka ran vulh enkawl turin ran vulhtute a chah a; Lawngtlai khawpuiin kawng hrang hranga hma a sawn theih nan VC, tlawmngai pawl leh mipui theihtawp chhuahpui turin a sáwm bawk.