Mimal sikulte'n harsatna an tâwk Board exam hmachhawn an huphurh
Covid-19 kaihhnawiha inkaihhruaina hrang hrang avangin hun rei tak chhung sikul hawn theih a ni lo a, hei vang hian mimai (private) sikulte'n harsatna an tâwk nasa hle; online-a class kal ringawt hmanga board exam (HSLC leh HSSLC) hmachhawn an huphurh tih an sawi.
Vanglaini palaiin Aizawla private sikul hrang hrang principal-te a biaknaah, private sikulte chuan sikul/in luah man leh zirtirtute hlawh atan an mamawh ang sum an hmu lo tih an sawi a, sikul hawn thuai an duh thu an sawi a ni.
Private school hotute chuan, zirtirtute hlawh 50% bâk an pêk theih meuh loh avangin chhungkaw châwma zirtirtu hna thawk tam takin harsatna an tawh thu te, online-a class kal chu ṭha tho mah se, chhungkaw dinhmun a inang lo a, zirlai zawng zawng an tel theih loh avangin board exam hmachhawn an huphurh thute Vanglaini palai an hrilh.
St. Joseph Higher Secondary School Principal chuan, kum dang ang thoin zirlai an neih tam rualin, fee 50% chauh an lâk avangin sum lamah harsatna an tawh nasat thu a sawi a, "Zirtirtute pawh hlawh 50% kan inpe a, sikul atan in pali kan luah bawk si avangin fee kan lâk hi chuan kan inenkawl zo meuh lo," a ti a; hostel fee-a innghat an nih ṭhin thu leh hostel hawn a theih tâk loh avangin an buai thu a sawi.
Online class hmanga zirtirna an kalpui reng thu leh term exam pawh an buatsaih ṭhin thu sawiin St. Joseph HSS Principal chuan, "Chhungkaw dinhmun a inang lo a, online class kal ve thei lo an awm nual ṭhin. Fee chungchangah pawh chhungkaw harsate chu hriatthiamna nen kan kaltir a ni," a ti.
Home Missions School Principal chuan Vanglaini palai zawhna chhángin, Mizoram sorkar ngenna avangin fee a zatve (50%) an lâk thu a sawi a, "Kan inenkawl zo meuh lo. Sorkarin min sawihmuh angin loan-te lain sikul dinna tur ram kan lei a, mahse, sikul leh hostel hawn theih a nih loh avangin sum kan hmu mumal thei lo," a ti a; in luah man leh zirtirtute hlawhah inenkawl zo dawn loa an inhriat avangin an ramte an hralh tawh thu a sawi.
Online class an kalpui chu zirlai 40% vel chiahin an chhawr theia a hriat thu sawiin HMS Principal chuan, "Chhungkaw dinhmun a inang lo a, online-a kal ve thei lo zirlai eng emaw zat an awm," a ti.
LR Higher Secondary School Principal chuan, kum dang nena tehkhinin, kum danga an zirlai zatve (50%) vel chauh kuminah zirlai an neih thu Vanglaini a hrilh a, "Fee 50% kan la chungin thingtlang aṭanga lo kalte leh khawpuiah pawh chhungkaw harsa tak takte an awm a, ngaihhnathiamna nen mi eng emaw zat chu kan zirtir a ni," a ti a; an sikul leh a kaihhnawih inenkawl nan sum chàwi belha an kal thu a sawi.
LR HSS Principal chuan, online class an kalpui reng rualin, thingtlang lama internet service ṭhat lohna hmuna awmte tan harsatna a tam thu a sawi bawk.