KHAWTHLIR

Peoples' Conference (PC) party chuan thuchhuah siamin, AMC term thar tur atan inthlan hun hle tawh mah se, Covid-19 darh nawn leh thei a nih avangin AMC inthlanpui neih chu a la hun rih loa an ngaih thu an tarlang. VC leh LC inthlan vangin hripui nasa takin a darh a, chhungkua leh khawtlangah buaina leh manganna a thlen phah tih sawiin, "Khatiang kha a thlen tawh loh nan AMC election awm turah fimkhur leh uluk taka hmalakna kalpui turin Mizoram sorkar kan beisei," an ti.

State Referral Hospital-ah Covid-19 vei mi 20 enkawl mek an ni a, an zingah kum 60 chung lam panga leh naupang kum 14 hnuai lam pakhat an tel. SRH-ZMC Bulletin tarlan danin, mi 20-te chu Isolation ward-ah an awm vek a, ICU-a enkawl an awm lo. Isolation ward-a awm zinga panga chu oxygen nen enkawl mek an ni. Hetih lai hian, enkawl zinga pakhat chu nimin khan chhuahtir a ni. 

December 2020 chhung khan Civil Hospital, Lunglei OPD leh Casualty-ah mi 4,525 an inentir a, damlo mi 347 dah luh an ni. December thla chhûng vêk khan Lunglei Civil Hospital-ah hian nau piang 71 an awm laiin, mitthi 11 an awm a; zaipui tâwk mi 78, zai tênau mi 216, laboratory-a en 8,859, x-ray hmanga en 253, ultrasound-a en 173, endoscopy-a en 27, dialysis tih mi 73, CT scan-a en 103 leh ECG-a en mi 111 an awm bawk. Blood bank-in thisen an dawn zat chu unit 215 a ni a, hman zat chu unit 240 a ni.

Mizoram Synod hnuaia pastor, awmna bial sawnte chu January 10, Pathianni khan an awmna tur bialah lak luh inkhawm (induction service) neihpui an ni. Pastor induction service hi hmun hrang hrangah neih a ni a, Synod puipate chu induction service neiin hmun hrang hrangah an kal a ni. Hetih lai hian, bial ṭhenkhatah chuan Covid-19 hripui léng leh a kaihhnawih thil avangin induction service hi January 17, Pathianniah neih a ni ang.