COVID-19: Mizoram dinhmun Chhuahtir tawh zat 97.69%

January 10, Pathian-ni khan Mizoramah Covid-19 vei mi pakhat hmuh chhuah a ni a, BSF sipai hnam dang a ni. Nimin khan hripui laka fihlîm tawh mi pahnih chhuahtir an ni thung. Mizoramah Covid-19 vei 4,293 hmuh chhuah tawh zinga mi 4,194 an chhuak tawh a, kái zat aṭangin 97.69% a tling.

Covid-19 vei Pathian­nia hmuh chhuah awm­chhun chu TrueNAT-PCR hmangin Lungleia hmuh chhuah a ni a; 199 Bn BSF sipai kum 30 mi, tun hnaia Assam aṭanga rawn lut niin, Lunglei Zotlanga AR hmuna inkhung hrang lai, symptom nei lo a ni.

Nimin khan hripui laka fihlim tawh mi pahnih chu enkawlna hmun aṭangin chhuahtir an ni a, SRH-ZMC leh Kolasib SIRD CCC aṭangin mi pakhat ve ve an chhuak.

Mizorama Covid-19 vei hmuh chhuah tawh chu mi 4,293 an ni a, mipa 3,148 leh hmeichhia 1,145 an ni. Nimin tlai dar 5 thleng khan damin mi 4,194 (97.69%) chhuahtir an ni tawh a, mi pakua (0.21%) thi tawhin, enkawl mek mi 90 (2.10%) an awm.

Pathianni khan ZMC laboratory-ah swab sample endik a ni lo a, Rapid Antigen Test (RAT) hmangin district pali-ah sample 144 endik ni mah se, Covid-19 vei hmuh chhuah a ni lo. RAT hmanga sample endik 144 nen January 10-a sample test zat chu 210 a ni a, hripui vei pakhat hmuh chhuah chu endik zat aṭangin 0.47% a ni.