Governor hoin RTI Week hman a ni; RTI hmangin dilna 45,000 chuang lut tawh

Nimin khan ATI Auditorium, Aizawlah Right to Information Week hman a ni a, Governor Gen. Dr Vijay Kumar Singh-a'n a hmanpui. October 7, 2025 thlengin RTI hmangin information dilna 45,000 chuang a lut tawh.

Chief Information Commissioner sawi danin, kum 2006-ah Mizoram Information Commission din a ni a, din a nih aṭanga October 7, 2025 thlengin RTI hmanga infor­ma­tion dilna 45,000 chuang a lut tawh a, SPIO-te'n an chhan zinga 98% chu an lungawi a, 2% (730) erawh Departmental Appellate Authority (DAA)-ah an zualko. DAA-a la lungawi lo 257 chu CIC-ah an zualko leh bawk.

RTI Online bikah October 7, 2025 thlengin information dilna 22,078 a lut tawh a, chawhrualin ni tin zawhna 18.5 zel lut ang a ni. Kum 2025 bikah ni tin zawhna 23.6 lut ang a ni a, tun October thla bikah ni tin zawhna 31 zel lut ang a ni.

Gen. VK Singh chuan, RTI Act chu langtlang, mawhphurhna la ngam leh mipui telna sorkar siamtu a nih thu sawiin, "Eirukna leh rorelna dik lo hai lang a, democracy innghahna leh thâ tichaktu a ni," a ti a; sorkar ṭha siamna tura sorkar laipui ruahmante sawiin, "Langtlang leh mipuite thûk zawka telna tur sorkar din tura siam vek a ni," a ti.

RTI Act chu mipui thâ tichaka thuneihna petu a nih rualin, mi dang chhaih buai nan hrim hrima hman sual a rem loh thu sawiin Larsap chuan, "Mipui rawngbawlna lam hawi ni lo, hun leh thâ khawhral nana hman loh tur a ni," a ti a; RTI Act chu thil ṭha zawk a awm theih nana hman ṭangkai a ṭul a, inepa inhuat phah nan hman loh a ṭul thu a sawi.

Governor chuan, sorkar hnathawkte'n RTI Act-in a phût angin mawhphurhna an hlen zel a ṭul thu a sawi rualin, an hna pangngai thawk thei lo khawpa RTI hmanga harsatna siamsak theihna erawh vên a ṭul thu a sawi a; Mizoramah sum hmuh nan leh mahni hmasial taka RTI hmang sual an awm lo nia a hriat thu sawiin, ṭangkai lehzuala RTI Act hmang turin mipui a chah.

Gen. VK Singh chuan, Mizoram Information Commission hmalakna fakawm a tih thu a sawi a; complaint an dawnte chinfel nghal zel a ni te, RTI inzirtirna zau taka kalpui a ni te, department website website uluk taka an vil ṭhin te, village/local council-te RTI huamtir a nite chu lawmawm a tih thu a sawi bawk.

Chief information commissioner (CIC) John Neihlaia chuan, Mizoram chu India rama RTI Act bawhzui ṭha berte zinga mi a nih thu sawiin, "July 1, 2022 aṭangin Mizoramah RTI online kalpui a ni a, India rama hetiang kalpui thei hmasa state zinga 8-na kan ni," a ti.

Aizawla RTI Week hmannaah hian RTI Act, 2005 Section 4(1)(b)-in a phût anga public authority website enkawl ṭhate hnenah Larsapin lawmman a hlan a; MIC logo design com-petition-a pakhatna Lal-hmingmawia, Republic Vengthlang hnenah lawmman a hlan bawk.

RTI Week hi nimin vêk khan Lawngtlai DC conference hall-ah pawh hman a ni a, bawrhsap Donny Lalruatsanga'n a hmanpui. Lawngtlai district-a state public information officer (SPIO), state assistant public information officer (SAPIO) leh tlawmngai pawl aiawhte an tel a ni.