Mizoram Travel Fest buatsaih ṭan a ni; Khualzin an pung nasa - Tourism Minister
Nimin khan Aijal Club-ah Mizoram Travel Fest 2025 ṭan a ni a, Tourism minister Lalnghinglova Hmar-in a hawng. Minister chuan, Mizoramah khualzin an pun nasat thu a sawi. Fest-ah hian nimin khan Mizo Thali Cooking Competition buatsaih a ni.
Mizoram Travel Fest hi tourism-in hma a sawn theihna tura inràwnkhawmna, zirhona leh indàwr tawnna tura Mizoram Tourism department leh sorkar laipuia Ministry of Tourism ṭang dun buatsaih a ni a, vawiin leh naktukah chhunzawm a ni ang.
Lalnghinglova Hmar chuan, Mizoramah khualzin an pung nasa hle tih sawiin, "Tun hnai kum rei lo te chhungin Mizoramah nasa takin khualzin awm zat a pung a, Sairang thlenga rél lo lut vangin an pun belh zel pawh a rinawm. Mizorama chengte'n khualzin dawnsawn danah inbuatsaihna ṭha tak kan neih a ngai dawn a, tourism-ah chuan infrastructure ai mahin mihring hmasawnna ngaih pawimawh hmasak a ṭul," a ti.
Mizoram tlawhtu pung chak mah se, state dangte nen khaikhinin a la tlem thu sawiin Minister chuan, "Khualzin hîpna ni pah fâwma kût leh thil dang kan buatsaih ṭhinte hi kum tina hun nghet neia tourism calendar siam ṭha kan ti a, Anthurium Festival pawh nakkum aṭang chuan kum tin hun nghet ruatin Reiekah buatsaih ziah kan tum," a ti a; tourism calendar siam theih a nih chuan state pawn aṭanga Mizoram tlawh tumte tan a awlsam phah dawn thu a sawi.
Tourism Minister chuan, 'tourism' tih chuan state páwn khualzin chauh ni loin, state chhunga mite pawh a huam thu sawiin, "Khaw dang kan tlawhin tourist kan ni vek a, economy ṭhan nan local tourism a pawimawh tel. Mizorama khualzin pung zel tur thlir chungin inbuatsaihna ṭha kan neih tlan a ngai a, khualzinte lo dawnsawn kawngah tour guide, hotel, taxi service, dawr leh ei tur bakah, mipuite'n inzirna tur kan la nei," a ti.
Travel Fest hawnnaah hian adviser to CM Dr KC Lalmalsawmzauva, ICFAI University vice chancellor Prof. Dr Ginlianlal Buhril, MZU associate professor Dr Pankaj Kumar, Tourism director R Lalrodingi leh joint director Lalṭhakimi Pachuau te pawhin thu an sawi.
Mizoram Travel Fest-ah hian nimin khan Aijal Club Park-ah YWCA nen ṭang dunin Mizo Thali Cooking Competition buatsaih a ni a; zanah cultural programme hman a ni. Vawiinah Chief Minister-in hmanpuiin, thil pawimawh tak tak sawiho a ni dawn a, naktukah 'Investing in Mizoram: Opportunities in Tourism, Culture & Sustainable Development' tih sawiho a ni ang. Zan lamah Aijal Club Park-ah cultural programme hman ṭhin a ni dawn a, zaithiamte an zai ṭhin dawn a ni.