Digital weighing scale 112 hawng

Food, Civil Supplies & Consumer Affairs (FCSCA) minister B Lalchhanzova chuan nimin khan Muanna Venga Supply kudam aṭangin Supply kudam tina hman tur buhfai bûkna, digital weighing scale 112 a hawng a; Saitual, Khawzawl leh Champhai district-a hman tur 35 a vailiam.

B Lalchhanzova chuan, Supply kudam tinah digital weighing scale hman a ni tur chu a lawm thu a sawi a, "Mipuite’n sorkara rinna an nghah theihna tura hmanraw ṭangkai a ni dawn. Kan department hi thla tina mipui mamawh petu kan nih avangin dik tak leh rinawm taka hna kan thawh a pawimawh a, kan hnathawhna apiangah hnuhma ṭha kan hnutchhiah a ṭul," a ti.

Aizawl East leh Aizawl West DCSO pisa tur MINECO-ah sak a nih dawn thu sawiin Supply Minister chuan, tun dinhmunah FCSCA department-in kudamah ngaih-ngam taka mipui an awm theihna tur khawp buhfai a chhêk khawl thu a sawi bawk.

DIGITAL WEIGHING SCALE
* Leina atan sorkar aṭangin cheng nuai 86 hmuh a ni.
* Original Equipment Manufacturer aṭangin lei a ni.
* Tender chhangtu company pali zingah Weightex Scales, Haryana thlan a ni.
* Digital weighing scale 112 hi district tina Supply kudam tinah hman tur a ni.
* Ṭum khatah quintal 25 (kg 2,500)-a rit a bûk thei.
* August 29, 2025 khan Haryana-a Weightex Scales factory aṭangin phurh chhoh a ni a, September 11, 2025 khan Muanna Venga Supply kudam thlenpui a ni.
* October 7, 2025 thleng khan Muanna Venga Supply kudamah buhfai quintal 33,075.76 leh chini quintal 208.94 a awm.