MURA-te in hmun tur Minister-in a enfiah

Land Revenue & Settle­ment (LRS) minis­ter Lalruatkima chuan nimin zing khan Mizo­ram Underground Retur­nees Association (MURA) member-te chhawm­dawlna atana Tuivamita in hmun pek a enfiah. Minister hi bialtu MLA Zothantluanga, LRS department official-te leh MURA hruaitute'n an ṭawiawm a ni. 

MURA member-te tana in hmun pek tur enfiahnaah LRS minister Lalruatkima chuan, MNF returnee-te chu ram tana an inpeknate sorkarin a hre reng a, a theih ang anga chhawmdawl zel a tum nia sawiin, "Sorkar chhawmdawlna zah a, in hmunte pawh a nihna ang taka hmang a, mi dang hnena hralh leh mai mai lo turin ruahmanna siam a ṭha," a ti.

MURA member- tan hian hun hmasa lamah Tuivamit ramah in hmun pek a ni a, eng emaw buaina avangin Court-a kalte an awm avangin chinfel mai theih a ni lo. MURA hruaitute chuan kumina chinfel theih ngei tura an duh thu LRS Minister hnenah an thlen a ni.

Tuivamitah hian MURA member-te tan in hmun 45 ruahman a ni a, in hmun an pek huam chhungah chuan Power & Electricity department-in ram an neih ve avangin enfiah nawn leh a ngai a ni.

LRS department chu chinfel ngaite a rang lama chingfel tura tih a ni a, chumi hnuah a neitu tur hnenah hlan a ni ang. In hmun 45 ruahmannaah hian anganwadi, biak-in leh YMA hall turte pawh a tel.