Zotuitlang leh Haulawng inkarah insuamna a thleng; mi 4 man tawh

Lunglei SP J Lalmuankima chuan, September 30, 2025 khan Zotuitlang leh Haulawng inkarah ralthuam nena invaua insuamna a thleng a, mi suamtu paruk zinga pali man an nih tawh thu leh mi dang pahnih zawn mek an nih thu a tarlang.

J Lalmuankima chuan nimin khan thuchhuah siamin, September 30 zan dar 8-9 inkarah Lawngtlai district aṭanga Silchar lam pana tlan Mahindra pik-up Maxx (var) MZ-07 A-0106 chu Lunglei district-a Zotuitlang leh Haulawng khaw inkarah hmai tuamte'n pistol nia hriat leh chemtê kengin an suam tih a tarlang a, "Report kan dawn angin thil thlenna hmun hi Lunglei Police-te'n tlawh nghalin, evidence awm thei angte enfiah a ni a, Lunglei Police Station-ah thubuai (C/No. 161/25 Dt.06.10.2025 u/s 310(2) BNS) ziah luh a ni," a ti.

Mi suamtute hian lirthei windshield an tichhia a, lirtheia chuang mi pathum hnen aṭangin pawisa Rs 10,15,000 bakah, mobile phone pahnih leh document an chhuh a ni.

Lunglei SP tarlan danin, insuamna kaihhnawihah hian Lawngtlai district mi pali - Mithun Chakma (37) s/o Purnyo Chandra Chakma, Udalthana-I te, Subaranta (40) s/o Jubhamoni, Ajasora/Thingkah te, Sandip Kumar Chakma (21) s/o Tirkana Chakma, Borkolok/Thingkah te, Sujit Chakma (36) s/o Chandrajit Chakma, Kamalanagar-II te man an ni tawh.

Chhui zuina kal zelah lirthei neitu leh khalhtu Sujit Chakma chu a inhnam hnawih ngei tih hriat a ni a; insuamnaa inhnamhnawih mi paruk zinga pahnih erawh chu an tlanbo a, zawn mek an ni.

Mizoram Police chuan, mi pahnih tlanbo mekte awmna chin hria leh lo hmute chu police station hnai berah a rang thei ang bera hriattir turin an ngen a; bungraw keng sumdawngte leh mipui zin veivâkte chu harsatna an tawh loh nan pawisa tam tham keng lo turin a ngen bawk.

LUNGLEI SP TARLAN

* September 30, 2025 zan dar 8-9 inkarah Mongkhoisu (62) s/o Uma Hmuiao, Prabrarang, Rakhine, Myanmar leh ṭawng lettu atana a hman Teatei Mong Tongchangya (45) s/o Radha Mohan Tongchangya, Longpuighat, Lawngtlai district-te chu Mahindra Maxx MZ-07 A-0106 hmangin lirthei neitu leh khalhtu Sujit Chakma te nen Silchar pan turin Lawngtlai aṭangin an chhuak.

* Zotuitlang leh Haulawng inkara an tlan laiin kawng laiah mi panga vel hmai tuamte'n pistol nia hriat leh chemtê kengin an lo tiding.

* Lirthei chu windshield an tichhia a, Mongkhoisu-a ipte ah laia pawisa Rs 10,00,000 leh document, Teatei Mong-a mobile phone leh Rs 10,000 leh, lirthei khalhtu mobile phone leh Rs 5,000 an chhuhsak.

* Mi 4 man an ni tawh a, lirthei neitu leh khalhtu Sujit Chakma chu a inhnamhnawih ngei tih hriat niin, insuamna hi a ruahman lâwk a ni.

* Pawi khawihtu paruk zingah pahnih - Santi Prasad leh Niramodin Chakma te an tlanbo a, anni hian pawisa an chhuhsak hi an la kawla hriat a ni.

* Insuamna thubuai hnamhnawihah hian Mahindra Bolero Maxx MZ-07 A-0106 leh pawi khawih nana hman scooter Suzuki Access MZ-01 W-2872 chu Police kutah a awm tawh.