Sorkar laipui scheme kalpui dan thlirho

Lok Sabha MP Richard Vanlalhma-ngaiha kaihhruaiin nimin khan Siaha District Development Coordination & Monitoring Committee (DISHA) an ṭhu-khawm a; sorkar laipui scheme kalpui kawnga hmalakna leh harsatnate an sawiho.

Richard Vanlalhmangaiha chuan, DISHA meeting chu kum khatah vawi li neih ṭhin tur a nih thu leh a hun takah neih zel tum a nih thu a sawi a, "Sorkar laipui chuan Vikshit Bharat 2047, India-in zalenna a hmuh aṭanga a kum 100-na kum 2047-ah chuan ram hmasawn (developed country) nih a tum a, DISHA pawh hi Vikshit Bharat 2047 inpuahchahna atana hmalakna pawimawh a ni," a ti a; department-te chu thawkho a, infinchhuah ṭhin turin a chah.

Palak bialtu MLA K Hrahmo pawhin thu sawiin, Lok Sabha MP chu Siaha district mamawhte ngaihvenpuia, a ṭul anga sorkar laipuia thlen ak leh bawhzuisak ṭhin turin a ngen.

Ṭhukhawmah hian MADC deputy chief executive member S Lalremthanga, bawrhsap VL Hruaizela Khiangte, sorkar department hotute leh tlawmngai pawl hrang hrang aiawhte an tel. Kum 2024-25 chhunga second quarter leh third quarter bika hmalakna leh 2025-26 chhunga first quarter leh second quarter inkara central scheme kalpui dante thlirho a ni.

DISHA hi Ministry of Rural Develop-ment hnuaia programme a ni a, district hrang hranga central scheme-te vil a, central scheme khawihtu department hrang hrangten thawhhona ṭha an neih theih nana hmalakna a ni. Chairman chu Lok Sabha MP-te an ni a, district bawrhsap-te chu member secretary an ni.