Dan loa sumdawnna chungchangah Siaha MJA-in MSO hmalakna an thlâwp

MJA, Siaha District chuan thuchhuah siamin, Siaha district-ah dan loa sumdawnna titawp tura Mara Students Organisation (MSO) Gen. Hqrs, Siaha hmalakna an thlâwp thu an tarlang.

Siaha district MJA chuan, "Siaha district chhunga non-tribal-te'n dan loa sumdawnna an kalpui nasa lutuk leh inchîmralna kawnga hlauhawm ber leh awlsam ber economic assimilation hmanga chîmral mek kan nih do tura MSO, Siaha hmalakna hi ṭha kan tiin lawmawm kan a ti. MSO hmalakna hi kan thláwp tlat a, mipuite pawh MSO hmalakna thlawp turin kan ngen a ni," an ti.

Siaha MJA chuan, Siaha khawpuiah hnam dang (non tribal), a ram leilung fate license hawha dan loa sumdawng, sublets trader mi 62 leh license nei miah loa dawrkai mi 10 an awm niin an tarlang. Tun hmaa MADC hruaitute'n non-tribal mi tlemtê hnena general license an pek chhan thinlung pêla tuna general license mi 28 hnena pek a ni tawh chu an ngaimawh thu sawiin, ennawn a, tihtlem dan ngaihtuah turin MADC hotute an ngen bawk.

Siaha district-a dan loa sumdawnna do chungchangah vawi duailo hmalak a ni tawh ṭhin tih sawiin Siaha MJA chuan, "A tawpah a zûzî leh mai ṭhin. Tun ṭuma hmalakna hi a tawp thlenga hma la turin MSO kan beisei a, mipui pawh ram hnuk, ram leh hnam himna leh kan hmeichhiate thlenga himna a ni tela ni tih hria a, a tawp thlenga ṭawiawm turin kan ngen a ni," an ti.