Aizawl district-ah thla 5 chhungin HIV vei mi 467 hmuh chhuah a ni

Sorkar kum 2025-26 kal mekah April-August (thla nga) chhungin Aizawl district-ah HIV vei mi 467 hmuh chhuah an ni a, chu'ng zinga 76.3% chu mipat hmeichhiatna aṭanga kai niin, 6.4% chu mahni anpui kawp (homosexual/bisexual) an ni.

Aizawl District AIDS Prevention and Control Committee (DAPCC) chu nimin khan an chairman Lalhriatpuia, district bawrhsap kaihhruaiin an ṭhukhawm a; April-August, 2025 chhunga DAPCC hmalaknate leh hmachhawpte sawihoin, HIV hrik kai thar an pun zel chungchanga hmalak dan tur an rêl.

Ṭhutkhawma tarlan danin, April-August, 2025 chhung khan Aizawl district-ah thisen 18,616 endik aṭangin HIV vei mi 467 hmuh chhuah a ni a, hmuh chhuah hi 2.51% a tling a, chawhrualin ni tin mi 3 aia tam hret (3.05) hmuh chhuah ziah ang a ni.

Mi nawlpui (general) bikah thisen 15,032 endik aṭangin HIV vei mi 448 a ni a, nu nau pai thisen endik 3,584 aṭangin HIV+ve mi 19 hmuh chhuah a ni. Thla nga chhunga HIV hrik pai hmuh chhuah zingah kum 25-35 inkar an tam ber a, kum 14 hnuai lam mi pasarih an tel.

Aizawl district-a thla nga chhunga HIV hrik pai hmuh chhuah zingah mipat hmeichhiatna aṭang kai 76.3% an awm a; inchiuna hriau aṭanga kai 14.7%, nu aṭang kai 1.5% leh kaina hriat loh (not specified) 0.8% an awm. HIV vei hmuh chhuah zingah hian anpui kawp 6.4% an awm bawk a ni.